काठमाडौं- वरिष्ठ पत्रकार प्रताप बिष्टद्वारा लिखित ‘छेलिएको अनुहार’ नामक पुस्तक सार्वजनिक भएको छ।
वागमती प्रदेश सरकारका भौतिक पूर्वाधार विकास राज्यमन्त्री सन्तबहादुर चेपाङ, हेटौंडा उपमहानगर प्रमुख मीनाकुमारी लामा, सन्तोषी वनकरिया, कान्तिपुर दैनिकका सम्पादक उमेश चौहान, राक्सिराङ गाउँपालिकाका अध्यक्ष राजकुमार मल्ल र वरिष्ठ साहित्यकार तुलसी थापाले संयुक्त रूपमा शनिबार उक्त पुस्तक विमोचन गरे।
१३ फागुन ०४९ मा कान्तिपुर दैनिकमा आबद्ध भएका पत्रकार विष्टले ०५० सालमा मकवानपुरका अल्पसंख्यक चेपाङ समुदायका विषयमा लेख्न शुरु गरेका थिए। ०५२ सालमा वनमै रहेका वनकरिया समुदायको समाचार लेखेका बिष्टलाई चेपाङ र वनकरिया पत्रकारका रूपमा उपमासमेत दिने गरिएको छ। सोही विषयलाई समेटेर पुस्तक तयार भएको छ।
सर्जक सञ्जाल मकवानपुरका संयोजक निमेख निखिलको अध्यक्षतामा भएको सो कार्यक्रममा त्रिभुवन विश्वविद्यालयका प्रा. डा. तारालाल श्रेष्ठ, चितवनका प्राध्यापक एवं साहित्यकार भूपिन, मकवानपुरका साहित्यकार तुलसी थापा र पत्रकार एवं लेखक चन्द्रकिशोर झाले विमोचित पुस्तकमाथि चर्चा गरेका थिए।