झापा । स्थानीय तहको निर्वाचन सम्पन्न भएर नयाँ जनप्रतिनिधि आएसँगै ‘नातेदार’ कर्मचारीहरू निकालिन थालिएको छ ।
यस क्रममा झापाको कचनकवल गाउँपालिकाले करार सेवामा राखिएको १८ जना नातेदार कर्मचारी निकाल्ने निर्णय गरेको छ । गाउँ कार्यपालिकाको असार २२ गते बसेको बैठकले उनीहरूलाई निकाल्ने निर्णय गरेको हो ।
आगामी आर्थिक वर्षदेखि करार सम्झौता नहुँदा उनीहरू निस्कनु पर्ने भएको हो । करार सम्झौता म्याद थप नगर्नेको सूचीमा इञ्जिनियरदेखि सामान्य कर्मचारीसम्म रहेको पालिकाले जनाएको छ ।
गाउँपालिकाले ती कर्मचारीको म्याद हरेक वर्ष थप गर्दै आएको थियो । तर, यसपटक नयाँ जनप्रतिनिधि आएसँगै उनीहरूको म्याद थप नभएको हो ।
यसैबीच, बिर्तामोड नगरपालिकामा पाँच वर्षमा झण्डै सय जना कर्मचारीलाई करार सेवामा नियुक्त गरेको छ । पछिल्लो समय उनीहरूलाई पनि निकाल्नु पर्ने माग उठ्दै आएको छ ।
यस्तै, तेह्रथुमको आठराई गाउँपालिकाले आगामी आ.व.मा करारका कर्मचारीको करार अवधि थप नगर्ने निर्णय गरेको छ । प्रमुख प्रशासकीय अधिकृत डम्बरबहादुर आङ्देम्बेले एकैपटक ८५ जना कर्मचारीको करार सेवा थप नगर्ने जानकारी दिएका हुन् ।