काठमाडौं- संघीय परिषद अध्यक्ष डा. बाबुराम भट्टराईले बोलाएको भनिएको भेलामा नजान जसपाले आफ्ना केन्द्रीय सदस्यहरूलाई आग्रह गरेको छ।
२९–३० असारमा वीरगञ्जमा बोलाइएको केन्द्रीय समिति बैठक मात्र आधिकारिक भएको उक्त पार्टीले बताएको छ।
केन्द्रीय कार्यालय प्रमुख प्रकाश अधिकारीले शुक्रबार विज्ञप्ति जारी गर्दै सोही मितिमा डा. भट्टराईले बोलाएको भेला अवैधानिक रहेको प्रष्ट्याएका छन्।
‘केही अराजक एवं गैरजिम्मेवार व्यक्तिहरूले पार्टीको विधान र निर्णयविपरीत अवैधानिक तथा अनधिकृत रूपमा केन्द्रीय समितिको बैठककै दिन जसपा, नेपालको केन्द्रीय समितिको विस्तारित बैठक काठमाडौंमा बस्ने भनी सामाजिक सञ्जाललगायत केही सञ्चारमाध्यमबाट भ्रम फैलाइरहेको बुझिन आएको छ,’ विज्ञप्तिमा भनिएको छ, ‘काठमाडौंमा त्यही दिन पार्टीको यस प्रकारको कुनै पनि आधिकारिक बैठक नरहेको जानकारी गराइन्छ।’
यसबाट जसपा विभाजनतर्फ अग्रसर रहेको प्रष्ट भएको छ। जसपा अध्यक्ष उपेन्द्र यादव र संघीय परिषद अध्यक्ष डा. भट्टराईबीच सहज ढंगबाट अलग हुने सहमति भइसकेको छ।