काठमाडौँ । करिब २० जना कैदीबन्दी अट्ने ठाउँ रहेको जाजरकोट कारागारमा ५४ कैदी बन्दी राख्दा व्यवस्थापनमा समस्य उत्पन्न भएको छ ।
सुधार गृहको रुपमा रहेको कारगारमा क्षमताभन्दा बढी कैदीबन्दी राख्दा व्यवस्थापनको समस्यले चुनौती थपिएको हो । कारागार १५ पुरुष र पाँच महिलाको क्षमतामा मात्रै रहेको छ ।
कारागारका नाइके कुशबहादुर महताराले क्षमताभन्दा बढी कैदीबन्दी भएपछि विद्युत्, खानेपानी, शैय्या र स्वास्थ्य उपचारमा समस्या उत्पन्न भएको बताए । संख्या बढी हुँदा सुत्नका लागि समस्या हुँदै आएको छ ।
कारागार प्रमुख चन्द्रबहादुर गिरीले जिल्ला कारगारमा अहिले ३५ कैदी र १९ थुनुवा गरी जम्मा ५४ कैदीबन्दी रहेको बताए । पुरानो भवन र क्षमताभन्दा बढी कैदीबन्दी हुँदा व्यवस्थापन गर्न कारागार प्रशासनलाई समस्या भइरहेको उनको भनाइ थियो ।
जिल्लामा रहेको कारागार जीर्ण भएपछि कैदीबन्दीले वर्षाको समयमा राम्ररी सुत्न नपाउने कैदीबन्दी दीर्घ बहादुर नेपालीले बताउँछन् । साथीहरु मिलेर आलोपाले गरी सुत्नु पर्ने बाध्यता रहेको उनले बताए ।
प्रमुख जिल्ला अधिकारी रामबहादुर शाहीले कारागारमा देखिएका समाधानका लागि पहल गरिने बताए । उनले कारागारमा क्षमताभन्दा बढी कैदीबन्दी हुँदा समस्या भइरहेको छ । यसको समाधानका लागि पहल जारी रहेको बताए ।
सबैले काम गर्छु भन्छन् । तर, काम केही हुने होइन भन्दै कैदीबन्दीले गुनासो पोख्दै आएका छन् ।