काठमाडौं- जनता समाजवादी पार्टी (जसपा) ले सरकारमा पठाउने तीन मन्त्रीको नाम सिफारिस गरेको छ। यसअघि सरकारमा सहभागी चारमध्ये तीन मन्त्रीलाई फिर्ता बोलाएर जसपाले नयाँ अनुहार सिफारिस गरेको हो।

भौतिक पूर्वाधारमन्त्री रेणुकुमारी यादव, कृषि तथा पशुपन्छीमन्त्री महिन्द्रराय यादव र वन तथा वातावरणमन्त्री रामसहाय यादवलाई जसपाले फिर्ता बोलाएको हो।

भौतिकमन्त्रीमा इस्तियाक राई, कृषिमा मृगेन्द्रसिंह यादव र वनमा प्रदीप यादवलाई सिफारिस गरिएको अध्यक्ष उपेन्द्र यादवले जानकारी दिए। उनले यसअघि सामान्य प्रशानमन्त्री रहेका राजेन्द्र श्रेष्ठलाई यथावत राखिएको बताए।

सिफारिस भएका मन्त्रीहरुले आजै सपथ लिने तयारी छ। गत साता बसेको केन्द्रीय कार्यकारिणी समितिको बैठकले मन्त्री हेरफेर गर्ने अधिकारी अध्यक्ष यादवलाई दिएको थियो।