बेइजिङ- कोरोना भाइरसको तेस्रो लहरबाट निस्किएको चीनले अर्थतन्त्रलाई पोस्ट कोभिड आक्रामकतामा अगाडि बढाउने तयारी थालेको छ।
त्यसको पछिल्लो कडी हो, चीनका तीनवटा एयरलाइन्स कम्पनीले खरिद गर्न लागेका ३०० वटा ठूला विमान। चाइना साउदर्न, चाइना इस्टर्न र एयर चाइनाले एकसाथ एयरबसबाट ठूला विमान खरिद गर्न लागेका हुन्।
एयर चाइना र चाइना साउदर्नले ९६-९६ वटा तथा चाइना इस्टर्न एक्लैले १०० वटा ठूला विमान अर्डर गरेका छन्। उनीहरूले एयरबसका ‘ए ३२० नियो’ फ्यामिलीका जेट विमान अर्डर गरेका छन्। एयर चाइना र चाइना साउदर्नले १२.२ बिलियन तथा चाइना इस्टर्नले १२.८ बिलियन डलर खर्च गर्ने भएका छन्।
सन् २०२३ देखि २०२७ सम्ममा ती विमान तयार भएर उड्न थाल्ने छन्। तीमध्ये सबैभन्दा धेरै संख्यामा सन् २०२४ मा चीन एयरबसले विमान डेलिभरी दिने भएको छ। एयर चाइनाले आफ्नो उडान क्षमतालाई १०.४ र चाइना साउदर्नले १३ प्रतिशत वृद्धि गर्ने लक्ष्य लिएका छन्।
चाइना साउदर्नले आफ्ना नयाँ विमान आन्तरिक रुट तथा छिमेकी मुलुकहरूमा उडाउने योजना बनाएको छ।
पछिल्ला दिनमा मुख्य व्यापारिक केन्द्र सांघाईमा कोरोना फैलिएका कारण भएको लकडाउन तथा गत मार्चमा बोइङ ७३७–८०० विमान दुर्घटनामा १३२ यात्रीको मृत्युका कारण चीनको एयरलाइन्स क्षेत्रले ठूलो क्षति बेहोरेको छ। उक्त विमान दुर्घटना चीनको मेनल्यान्डमा भएको २८ वर्षयताकै ठूलो क्षति हो।
तर, कोभिड महामारी शुरु भएयताको क्षति रिकोभर गर्न चिनियाँ एयरलाइन्सहरूले आक्रामक बजार विस्तारको नीति लिएका हुन्। चीनमै निर्मित ‘सी ९१९’ न्यारोबडी विमानलाई पनि उडानयोग्य प्रमाण पत्र दिने तयारी पनि चीन सरकारले अगाडि बढाएको छ। सन् २०२२ भित्रै उक्त विमानले उडानयोग्य रहेको प्रमाण पत्र पाउने सम्भावना छ।