पटना- बिहार प्रहरीले शुक्रबार विभिन्न होटलबाट छापा मार्दा बमसमेत बरामद गर्यो। त्यो बमलाई प्रहरीले दशी प्रमाणका रूपमा अदालतमा पुर्यायो। असावधानीपूर्वक प्रहरीले गरेको यो हर्कतले अदालतमै बम विष्फोट हुन पुग्यो।
शुक्रबार प्रहरीले होटलहरूमा संदिग्ध गतिविधि हुने गरेको आशंकामा छापा मारेको थियो। सोही क्रममा कमदकुआ थानाको प्रहरीले एक होटलमा बम फेला पार्यो। त्यसरी फेला परेको बम निश्क्रिय बनाउनुको साटो प्रहरीले स्थानीय अदालतमा लिएर गयो।
बमलाई प्रहरीले घेरा दिएर अदालतको एउटा कोठामा राख्यो। तर, विष्फोटक पदार्थ कहाँ प्रहरीको घेराका कारण पड्किन छाड्थ्यो र ! अचानक बम विष्फोट भयो।
विष्फोटमा परी चार प्रहरी घाइते भएका छन्, जसमा एक थाना इन्चार्ज पनि छन्। गम्भीर घाइते उनीहरूको पटना मेडिकल कलेज हस्पिटलमा उपचार भइरहेको छ।
आफ्नो लापरवाही ढाकछोप गर्न प्रहरीको दाबी फरक छ। अत्यधिक गर्मीका कारण बम पड्किएको प्रहरीले दाबी गरेको छ। यस घटनाबारे प्रहरी टोलीले अनुसन्धान अगाडि बढाएको छ।