काठमाडौं- युक्रेनको क्रेमेन्चकमा रहेको एउटा सपिङ मलमा रुसी मिसाइल आक्रमणमा परी मृत्यु हुनेको संख्या १८ पुगेको छ।

पोल्टाभाका सैन्य प्रमुख दिमित्री लुनिनले २८ जुनमा टेलिग्राममा सूचना जारी गर्दै उक्त जानकारी दिएका हुन्।

जुन २७ मा पोल्टाभा क्षेत्रको क्रेमेन्चकमा रहेको एउटा सपिङ मलमा रुसी मिसाइल प्रहार भएको थियो। उद्धारकर्मीहरूले रातभर उद्धार कार्य जारी राखेका थिए।

युक्रेनी राष्ट्रपति भोलोदिमिर जेलेन्स्कीले आक्रमणको समयमा भवनमा १ हजार मानिस रहेको दाबी गरेका छन्। जेलेन्स्कीले सपिङ मलमा रुसको मिसाइल आक्रमणले यसलाई ‘विश्वको सबैभन्दा ठूलो आतंकवादी संगठन’ बनाएको बताए।

जर्मनीमा भइरहेको शिखर सम्मेलनका क्रममा जी-७ देशले आक्रमणलाई ‘युद्ध अपराध’ भनेका छन्। जी-७ देशहरुको यो बैठकमा रुस-युक्रेन युद्धलाई छलफलका महत्वपूर्ण विषयहरुमा समावेश गरिएको थियो।