वासिङ्टन- अमेरिका, बेलायत र जापानले रुसमा उत्पादित सुन आयातमा प्रतिबन्ध लगाएका छन्।
युक्रेनमा चार महिनादेखि गरिरहेको आक्रमण नरोकेको उल्लेख गर्दै रुसको सुन आयातमा ती मुलुकले प्रतिबन्ध घोषणा गरेका हुन्। रुसको अर्थव्यवस्थामाथि थप चोट पुर्याउन पछिल्लो कदम उठाइएको ती मुलुकको भनाइ छ।
अमेरिकी राष्ट्रपति जो बाइडेनले जी-७ का सदस्य मुलुकहरू जर्मनी, फ्रान्स र इटालीले पनि रुसमा उत्पादित सुन आयातमा प्रतिबन्ध लगाउने बताए। ‘युक्रेनमा जारी आक्रमणका लागि धन जुटाउने रुसको प्रयास रोक्नका लागि अमेरिकाले पछिल्लो कदम उठाएको हो। यसबाट रुसी राष्ट्रपति भ्लादिमिर पुटिनलाई थप झड्का लागेको छ,’ बाइडेनले भने, ‘जी-७ मुलुकहरूका साथ मिलेर थप प्रतिबन्ध लगाउने छौँ। रुसबाट अर्बौं डलरको सुन निर्यातमा प्रतिबन्ध लगाइएको छ।’
आइतबारदेखि मंगलबारसम्म जर्मनीमा जी-७ मुलुकको बैठक हुँदैछ। युद्धका लागि धन जम्मा गर्ने रुसी राष्ट्रपति पुटिनमाथि पछिल्लो कदमबाट ठूलो असर पर्ने बेलायतले बताएको छ। बेलायतका प्रधानमन्त्री बोरिस जोनसनले पछिल्लो निर्णयबाट पुटिनको वार मेसिनमाथि चोट पुग्ने बताए।
उनका अनुसार युक्रेनमाथि रुसको आक्रमणपछि सुनको महत्त्व विगतभन्दा बढेको छ। सोही कारण रुसी सभ्रान्त वर्गले सुन र चाँदीमा लगानी बढाएका छन्। सन् २०२१ मा रुसबाट १५ अर्ब डलरको सुन निर्यात भएको थियो।
२४ फेब्रुअरीमा रुसले युक्रेनमाथि आक्रमण थालेयता पश्चिमा मुलुकहरूले रुसविरुद्ध हालसम्म एक हजारभन्दा ज्यादा मानिस र कारोबारमा प्रतिबन्ध लगाइसकेका छन्। रुसी सुन आयातमा पश्चिमा मुलुकको प्रतिबन्धले संसारभर सुनको भाउ अझ बढ्ने अनुमान छ।