इजरायलमा संसद विघटन गर्न संसदमै मतदान हुने भएको छ।

प्रधानमन्त्री नफ्ताली बेनेट र विदेश मन्त्री यायिर ल्यापिडबीच संसद विघटन गर्ने सहमति भएको छ। सोहीअनुसार संसदमा मतदान हुने भएको हो।

इजरायलमा संसद विघटन गर्न संसदकै सहमति अनिवार्य छ। कुनै पनि प्रधानमन्त्रीले सनकमा संसद विघटन गर्न पाउँदैन।

संसदमा मतदानपछि अन्तरिम सरकारको नेतृत्व विदेशमन्त्री ल्यापिडले गर्ने भएका छन्। र, प्रधानमन्त्री बेनेटले राजीनामा गर्ने भएका छन्।

तत्कालीन प्रधानमन्त्री बेन्जामिन नेतन्याहु सत्ताच्युत भएपछि बेनेट र ल्यापिडबीच जुन २०२१ मा गठबन्धन भएको थियो।

हालको गठबन्धन सरकारमा अति दक्षिणपन्थी, उदारवादी र मुस्लिम अरबजस्ता राजनीतिक घटकहरू सहभागी छन्। आपसमा विरोधाभाषपूर्ण गठबन्धन भएकाले लामो समय सत्तामा नटिक्ने आकलन हुँदै आएको थियो।