काठमाडौँ । नेपाली सेनाका प्रधानसेनापति प्रभुराम शर्मा लेवनान प्रस्थान गरेका छन् । द्वन्द्व ग्रस्त मुलुकहरुमा रहेको नेपाली फौजको हौसला अभिवृद्धि गर्न उनी आज भ्रमणमा निस्किएका हुन् ।
नेपाल सरकारका रक्षा सचिवसहित सात जना भ्रमण दलको नेतृत्व गरी प्रधानसेनापति शर्मा लेवनानतर्फ प्रस्थान गरेका हुन् । उनलाई त्रिभुवन अन्तर्राष्ट्रिय विमानस्थलको भीआईपी कक्षमा बलाधिकृत रथी बालकृष्ण कार्कीले बिदाइ गरेका थिए ।
प्रधानसेनापति शर्मा आजदेखि असार १० गतेसम्म संयुक्त राष्ट्रसंघको आव्हानमा शान्ति स्थापनार्थ नेपाली शान्ति सैनिक तैनाथ लेवनान गएका हुन् । यस्तै, उनी सिरियामा पनि जाने भएका छन् । यस क्रममा उनले मिशनको वस्तुस्थिती, अपरेशनल गतिविधि, फौज तैनाथीको अवस्थालगायत पक्षका बारेमा जानकारी लिने भएका छन् ।
भ्रमणका क्रममा प्रधानसेनापति शर्माले लेवनान, सिरियाका उच्च पदस्थ अधिकारीसँग भेटघाट गर्ने भएका छन् ।
उक्त भ्रमणपश्चात प्रधानसेनापति शर्माले संयुक्त राज्य अमेरिकाको औपचारिक निमन्त्रणामा असार १३ गतेदेखि १७ गतेसम्म औपचारिक भ्रमण गर्नु हुने कार्यक्रम रहेको छ ।
प्रधानसेनापति शर्माको भ्रमण अवधिभर बलाधिकृत रथी बालकृष्ण कार्कीले कायम मुकायम प्रधानसेनापतिको कार्यभार सम्हाल्ने भएका छन् ।
