काठमाडौँ । त्रिभुवन विश्वविद्यालय (त्रिवि) इञ्जिनियरिङ अध्ययन संस्थानअन्तर्गत धादिङको बेनीघाट रोराङ ३ रिचोकटारका मनिष प्रजा अल्पसंख्यक चेपाङ समुदायकै पहिलो सिभिल इञ्जिनियर बनेका छन् ।
संस्थानको गत जेठ ३० गते प्रकाशित नतिजाअनुसार बल्खुस्थित एड्भान्स इञ्जिनियरिङ कलेजबाट उनले सिभिल इञ्जिनियर उत्तीर्ण गरेका हुन् । संस्थानले एक महिनापछि ‘मार्कसिट’ दिने छ ।
पिता तिलक चेपाङ र आमा लक्ष्मी चेपाङका छोरा मनिष सानैदेखि पढाइमा अब्बल थिए । उनले प्रवेशिका परीक्षामा ८७ प्रतिशत अंक ल्याएका थिए । विज्ञान विषय लिई अध्ययन गरेका मनिषले कक्षा १२ को परीक्षामा ८४ प्रतिशत अंक प्राप्त गरेका जनाइएको छ ।
नेपाल चेपाङ संघ शिक्षा विभागको संयोजनमा चेपाङ समुदायका ५० बालबालिकालाई संस्थागत विद्यालयको संगठन प्याब्सन र एनप्याब्सनमार्फत सञ्चालित विद्यालयमा निःशुल्क अध्ययन गर्ने व्यवस्था मिलाइएको संयोजक तिलक चेपाङले जानकारी दिए ।
मलेखुस्थित पशुपति शिक्षा मन्दिरबाट विद्यालय जीवन सुरु गरेका मनिषले काठमाडौँको माउन्ट सिनाई स्कुलबाट ८७ प्रतिशतसहित एसएलसी उत्तीर्ण गरेका थिए । सरकारको सिफारिसमा छात्रवृत्तिसहित नोबल एकेडेमीमा ८४ प्रतिशत ल्याएर उत्तीर्ण भएका थिए ।
मनिष भविष्यमा सफल सिभिल इञ्जीनियर बनेर स्वदेशकै ग्रामीण सडक, पुल, जलविद्युत्, सुरुङ निर्माण क्षेत्रमा सेवा गर्न चाहन्छन् । उनी आफ्नो क्षेत्रबाट लोकसेवा आयोग प्रतिस्पर्धा गरेर सरकारको पहिलो मुख्यसचिव बन्ने लक्ष्य लिएको बताउँछन् ।