काठमाडौँ । नेपाली कांग्रेसका सांसद तथा महामन्त्री गगन थापाले इम्बोस्ड नम्बर प्लेटको नाममा सरकारले जनतालाई धम्की दिएको बताएका छन् । उनले इम्बोस्ड नम्बर प्लेट राख्नेबारे पुनर्विचार गर्न सरकारसँग मागसमेत गरेका छन् ।
यातायात मन्त्रालयले आगामी साउन १ गतेदेखि सवारी साधनमा इम्बोस्ड नम्बर प्लेट जडान नगरे कारबाहीको सूचना निकालेको थियो । उनले मन्त्रालयले समस्या समाधान नगरी जनतालाई धम्की दिएको भन्दै आपत्ति जनाए ।
‘यातायात मन्त्रालयले दण्ड र जरिवानाको डर देखाएर नागरिकलाई तर्साउने काम गरेको छ,’ सांसद थापाले आज प्रतिनिधि सभा बैठकमा भने, ‘जवरजस्तीलाई बन्द गरियोस् होइन भने नागरिकले अवज्ञा गर्छन्, त्यसअघि सरकारले पुनर्विचार गरोस् ।’
उनले इम्बोस्ड नम्बर छिमेकी देशमा भन्दा नेपालमा धेरै महँगो भएको बताए । गण्डकी र बागमतीको यातायात कार्यालयमा दर्ता भएका सवारी साधनले साउन १ भित्र इम्बोस्ड नम्बर राख्न चेतावनी दिएको छ ।