काठमाडौँ । रुपन्देहीको रोहिणी पुलमा यात्रुबाहक बस खस्दा नौ जनाको मृत्यु भएको छ । जसमा छ जनाको पहिचान खुलेको छ । बाँकी तीन जनाको पहिचान खुलेको छैन ।
मृत्यु हुनेमा बुटवलको योगिकुटीका ५६ वर्षीया विष्णु पौडेल, बुटवल ११ कालिकानगरका कृष्णप्रसाद बस्याल, रौतहटका २० वर्षीया दिनेश दास, रूपन्देहीकै ओमसतिया गाउँपालिका ४ मटेरियाका राजेन्द्रप्रसाद पाण्डे र रूपन्देहीकै तिलोत्तमा नगरपालिका ९ की तुल्सी बस्याल रहेका छन् । यस्तै, एक भारतीय नागरिक अरविन्द्र शर्मा रहेका छन् ।
आइतबार बिहान करिब साढे ४ बजे लु २ ख ३८४१ नम्बरको बस जनकपुरबाट भैरहवातर्फ आउँदै गर्दा परासी–भैरहवा सडक खण्डअन्तर्गत रुपन्देहीको रोहिणी गाउँपालिकाको रोहिणी पुलबाट खोलामा खसेको थियो ।
घटनामा घाइते भएका २४ जनाको मेडिकल कलेज र भीम अस्पतालमा उपचार भइरहेको जिल्ला प्रहरी कार्यालय रुपन्देहीले जनाएको छ ।