काठमाडौँ । सत्ता गठबन्धन दल नेकपा एकीकृत समाजवादीका अध्यक्ष माधव नेपालले तत्काल वाम एकता नहुने बताएका छन् । सुर्खेतमा आज आयोजित पत्रकार भेटघाट कार्यक्रममा उनले नेकपा एमाले, नेकपा माओवादी केन्द्र र एकीकृत समाजवादीबीच तालमेल हुने कुरा हल्ला मात्रै भएको बताए ।
अध्यक्ष नेपालले एमालेसँग वाम एकता या चुनावी तालमेलको कुनै सम्भावना नरहेको बताए । ‘अहंकारी र षड्यन्त्रकारीले वर्तमान वाम लोकतान्त्रिक गठबन्धन तोड्न अनेक खाले भ्रम फैलाइरहेका छन्,’ उनले भने, ‘हामीमा कुनै पदको लालचा छैन, षड्यन्त्रकारीको भ्रमलाई सजिलै परास्त गर्न सक्छौँ ।’
अध्यक्ष नेपालले हालै सार्वजनिक भएको आगामी आर्थिक वर्षको बजेट चुनावीमुखी नभएको टिप्पणी गर्दै भने, ‘बजेट चुनावको समयमा आएको हो तर, चुनावीमुखी होइन ।’
उनले स्थानीय तह निर्वाचन परिणामलाई समीक्षा गर्दै आगामी प्रदेश र प्रतिनिधिसभा निर्वाचनसम्म अहिलेकै वाम लोकतान्त्रिक गठबन्धनलाई निरन्तरता दिने धारणा राखे ।
स्थानीय तह निर्वाचनमा आफ्नो पार्टीले गर्वलायक सफलता प्राप्त गरेको र कतिपय पालिकामा चुनाव चिह्नको अस्पष्टताले गर्दा सिट गुमाउनु परेको उनको भनाइ थियो ।
अध्यक्ष नेपाल आफ्नो पार्टीबाट निर्वाचित जनप्रतिनिधिलाई बधाई तथा प्रशिक्षण दिन सुर्खेत पुगेका हुन् ।