काठमाडौँ । आइतबार बिहान वरिष्ठ पाइलट प्रभाकर घिमिरेले चलाएको तारा एयरको जहाज एकाएक सम्पर्कविहीन भयो । पोखरा विमानस्थलबाट जोमसोमका लागि उडेको विमान उडान भरेको १२ मिनेटपछि नै सम्पर्कविहीन भएसँगै खोजी सुरु भयो ।
पटकपटक बेपत्ता विमान खोजीका लागि उडेको हेलिकोप्टर मौसमका कारण सम्भावित घटनास्थल पुग्न सकेन । आइतबार साँझसम्म विमानको खोजी कार्य सफल हुन सकेन ।
सोमबार बिहान जहाज दुर्घटनाग्रस्त अवस्थामा फेला पर्यो । आइतबार बिहान ९ः५५ बजे पोखराबाट उडेको विमान एक दिनपछि फेला पर्दा विमानमा सवार सबै जनाको शव फेला पर्यो ।
तारा एयरकै वरिष्ठ पाइलटका रुपमा कार्यरत पाइलट घिमिरे हवाई सेफ्टीमा निकै चासो राख्थे । उनी नयाँ पाइलटलाई तालिम नै दिन्थे ।
२२ वर्षदेखि उडान भर्दै आएका उनी सेफ्टीमा दत्तचित्त हुन्थ्ये । र, सबैलाई आफ्नो अनुभव दिँदै सचेत हुन आग्रह गर्थे । तर, आइतबार उनको सेफ्टी अनुभवले काम गरेन ।
उडान भर्नुअघि पनि घिमिरेले जहाजको सेफ्टी जाँच गराएका थिए । त्यसअघि सोही रुटमा समिट एयरले उडान भरिसकेको थियो ।
सेफ्टीकै लागि पाइलट घिमिरेले उड्नुअघि आफूभन्दा अगाडि गएको समिट एयरका पाइलटसँग सम्पर्क गरी मौसमको अवस्थाबारे जानकारी लिएका थिए ।
तारा एयरका ‘सेफ्टी डिपार्टमेन्ट डाइरेक्टर’समेत रहेका प्रभाकरलाई आफैँले उडान भरेको जहाजमा धोका भयो । आफ्नै अनुभवमा धोका खाएका उनी आफूले बोकेका यात्रुसहित कहिले नफर्किने बाटो गए ।
सन् २००५ मा तारा एयरको पाइलट बन्नुअघि उनी नेपाल नागरिक उड्डयन प्राधिकरणको सेफ्टी टिममा काम गर्थे । सन् १९९७ मा अमेरिका गएका उनी पाइलट कोर्स सकिएपछि नेपाल फर्किए । आफ्नो अनुभवलाई नेपालमै लागु गर्दै आए ।