चीनले सिन्जियाङ प्रान्तमा ‘सुपर-हाई प्लेटो विमानस्थल’ तयार पारेको छ। ट्याक्सकोर्गन अन्तर्राष्ट्रिय विमानस्थल समुद्री सतहबाट ३२ सय ५० मिटर उचाइमा छ।
३८ सय मिटर लामो यसको धावनमार्गबाट वार्षिक एक लाख ६० हजार यात्रीलाई सेवा दिने चीनको योजना छ। यस्तै, चार सय टन कार्गो ढुवानीका लागि पनि यसको डिजाइन गरिएको छ। यो विमानस्थलमा एयरबस ३१९-११५ विमानले हालै परीक्षण उडान गरेको छ।
समुद्री सतहबाट २४ सय ३८ मिटरभन्दा बढी उचाइको विमानस्थललाई ‘सुपर हाई प्लेटो’ नाम दिने गरिएको छ।
यो विमानस्थलमा आगामी जुलाईदेखि नियमित उडान थाल्ने चिनियाँ योजना छ। यो विमानस्थलको निर्माण कोभिड-१९ महामारीका बीच २६ अप्रिल २०२० मा शुरु गरिएको थियो। र, एक अर्ब ६३ करोड युआन खर्च भएको छ।
काराकोरम हाइवेमा पर्ने ट्याक्सकोर्गन चीन र ताजिकिस्तानको सीमानजिक पर्छ। र, यो पाकिस्तान शासित कश्मीरको गिलगित-बाल्टिस्तान प्रान्तको राजधानी गिलगितबाट दुई सय किलोमिटर उत्तरमा पर्छ। त्यसैले यस विमानस्थललाई चीन-पाकिस्तान आर्थिक करिडोर (सीपीईसी)को एक हिस्साका रूपमा व्याख्या गरिएको छ।