ठूला राजनीतिक दलका नाम चलेका नेताहरूलाई निकै धेरै मतले पछि पार्दै अन्ततः बालेन्द्र शाह(बालेन) काठमाडौंको मेयरमा चुनिएका छन्।
३२ वर्षीय बालेनलाई मेयर बनाउनका लागि काठमाडौंका ६१ हजार ७६७ मतदाताले भोट दिएका छन्। कांग्रेसकी उम्मेदवार सिर्जना सिंहले ३८ हजार ३४१ मत ल्याएर दोस्रो भएकी छन् भने एमालेका केशव स्थापितले ३६ हजार ११७ मत ल्याए।
गत मंसिरमै काठमाडौंको मेयरमा उठ्ने घोषणा गरेसँगै उनलाई सञ्चारमाध्यमहरूले पछ्याउन थालिसकेका थिए। तर त्यसको तयारी भने उनले पाँच वर्षअघि देखि नै गर्दै आएका थिए।
‘र्याप’ गाएर युवाहरूमाझ चर्चित भइसकेका बालेन पेशाले स्ट्रक्चरल इन्जिनियर हुन्। खास नाम बालेन्द्र शाह भए पनि र्याप गाउँदै गर्दा उनी ‘बालेन’ भए।
काठमाडौंको नरदेवीमा जन्मिएका उनी अहिले भने सिनामंगलको गैरीगाउँमा बस्छन्।
उनका बुवा रामनारायण साह नेपालकै पुराना र चर्चित आयुर्वेदिक डाक्टर हुन्। डाक्टर रामनारायण र ध्रुवदेवी साहका उनी कान्छा छोरा हुन्।
बालेनको पुर्ख्यौली घर महोत्तरी हो। उनका बुवा करिब ४० वर्षअघि सिंहदरबार वैद्यखानामा जागिरे भएपछि उनीहरू काठमाडौं सरेका हुन्। त्यसपछि बालेन पनि यहीं जन्मिए।
