काठमाडौँ । गत वैशाख ३० गते भएको स्थानीय तह निर्वाचनको अन्तिम मत परिणाम करिब सम्पन्न भइसकेको छ । सार्वजनिक मत परिणामअनुसार नेपाली कांग्रेस सबैभन्दा धेरै पालिकामा जित हात पार्दै पहिलो पार्टी बनेको छ ।
नेपाली कांग्रेसले हालसम्म ३२५ स्थानमा मेयर तथा अध्यक्ष पदमा जित हात पार्दै तीन स्थानमा अग्रता लिइरहेको छ । यस्तै, २९८ पालिकामा उपमेयर तथा उपाध्यक्षमा जित हात पारेको छ ।
दोस्रो स्थानमा रहेको नेकपा एमालेले अहिलेसम्म २०३ पालिकामा मेयर तथा अध्यक्षमा जितेको छ । उपमेयर तथा उपाध्यक्षमा भने २३६ स्थानमा जितेको छ । अहिले ३ स्थानको एमालेले अग्रता कायम राखेको छ ।
सत्ता गठबन्धन गरी चुनावी तालमेल गरेको नेकपा माओवादी केन्द्र देशको तेस्रो ठूलो दल बनेको छ । पहिलेको तुलनामा धेरै सुधार गर्दै केही बढी स्थानमा जित हात पारेको माओवादीले कूल १२१ पालिकामा मेयर तथा अध्यक्ष पदमा जित हात पारेको छ ।
यस्तै, १२६ पालिकामा माओवादीले उपमेयर तथा उपाध्यक्ष जितेको छ । तर, माओवादीले करिब दुई दर्जन जिल्लाका कुनै पनि पालिकामा नेतृत्व हासिल गर्न सकेन ।
जसमा पश्चिमी जिल्लामाहरूको तुलनामा पूर्वी जिल्लाहरूमा माओवादी कमजोर देखिएको छ । यस्तै, माओवादीले काठमाडौँ उपत्यकाका कुनै पनि पालिकाको प्रमुख पद पाउन सकेन । तर, केही स्थानमा उपप्रमुख पद र वडाहरूमा जित हात पारेको छ ।
माओवादी केन्द्रले शून्य भएका जिल्लाहरू
१, पर्वत
२, अर्घाखाची
३, कास्की
४, मुस्ताङ
५, मनाङ
६, स्याङ्जा
७, नवरपरासी पूर्व
८, लमजुङ
९, रसुवा
१०, पर्सा
११, काठमाडौँ
१२, ललितपुर
१३, भक्तपुर
१४, महोत्तरी
१५, धनुषा
१६, सुनसरी
१७, मोरङ
१८, झापा
१९, इलाम
२०, धनकुटा
२१, संखुवासभा
२२, तेह्रथुम
