काठमाडौं- भोटेकोशी बाढीबाट नेपालका भएको जनधनको अपुरणीय क्षतिप्रति समवेदना व्यक्त गर्न पाकिस्तानका प्रधानमन्त्री शहबाज शरिफ बिहीबार इस्लामावादस्थित नेपालको दूतावासमा पुगेका छन्।

प्रधानमन्त्री शरिफले पाकिस्तानका लागि नेपालकी राजदूत रिता धितालसँग भेटेर बाढीबाट भएको अपुरणीय क्षतिप्रति समवेदना व्यक्त गरे। र, दूतावासमा राखिएको शोक पुस्तिकामा हस्ताक्षर गरे।

प्रधानमन्त्री शरिफका साथमा सूचना मन्त्री अताउल्लाह तरार, प्रधानमन्त्रीका विशेष सल्लाहकार सैयद तारिक फातेमी, विदेश सचिव अन्ना बलोचलगायत अधिकारीहरू पनि दूतावास पुगेका थिए।

आफ्नो शोक सन्देशमा प्रधानमन्त्री शरिफले नेपाल सरकार र नेपाली जनता तथा यस त्रासदीमा आफ्ना प्रियजनहरू गुमाएका परिवारहरू प्रति पाकिस्तानको तर्फबाट गहिरो सहानुभूति व्यक्त गरेका छन्। र, पाकिस्तान यस विपदको घडीमा नेपाल र नेपाली जनताको साथमा खडा गरेको दोहो¥याए।

त्यस अवसरमा यस साताको अन्तिमसम्ममा नेपालमा चलिरहेको उद्धार र राहत कार्यका लागि पाकिस्तानले आकस्मिक राहत नेपाल पठाउँदै गरेको जानकारी पनि प्रधानमन्त्री शरिफले राजदूत धिताललाई गराए। नेपालका साहसी नागरिकहरू यस त्रासदीबाट छिट्टै मजबुत भएर खडा हुने आशा पनि उनले व्यक्त गरे।

नेपाल र पाकिस्तानबीच लामो समयदेखि भाइचाराको सम्बन्ध रहेको उल्लेख गर्दै उनले दुवै मुलुक एकअर्काको विपत्तिको समयमा एकसाथ खडा हुँदै आएको स्मरण गरे।

राजदूत धितालले प्रधानमन्त्री शरिफलाई उनको मायालु र भरोसायोग्य शब्दहरूका लागि धन्यवाद दिइन्। र, भनिन्, ‘नेपालका नागरिकहरूले यस विषयलाई लामो समयसम्म याद राख्नेछन्।’