काठमाडौं- आज ८ जुलाई। विश्व इतिहासका असंख्य घटनाले आजको दिन स्मरण गराउँछन्। प्रस्तुत छ, आजको दिन भएका केही विश्व चर्चित घटनाको सारसंक्षेप।
– सन् १९९४- किम जोङ-इल उत्तर कोरियाका सर्वोच्च नेता
उत्तर कोरियाका नेता किम इल-सुङको निधनपछि उनका छोरा किम जोङ-इल आजकै दिन उत्तर कोरियाका सर्वोच्च नेता नियुक्त भएका थिए। उनलाई ‘डियर लिडर’को उपनाम दिइएको थियो। सन् २०११ मा निधन हुनु अघिसम्म उनी उत्तर कोरियाका सर्वोच्च नेता रहेन। उनको निधनपछि हाल उनकै छोरा किम जोङ-उन उत्तर कोरियाका सर्वोच्च नेता छन्। उनका बाबु किम इल-सुङकै जस्ता किम जोङ-इलको शासनकालमा पनि उत्तर कोरियामा व्यापक मानव अधिकार हननको आरोप लागेको थियो। उनका छोरा किम जोङ-उनको कार्यकालमा पनि उत्तर कोरिया तानाशाही शासनकै कारण बदनाम छ।
– सन् २००३- सुडानी विमान दुर्घटनामा मारिए ११६
सन् २००३ मा आजकै दिन सुडान एयरवेजको फ्लाइट-१३९ दुर्घटनामा ११६ जना मारिएका थिए। दुर्घटनामा बाँचेका २ वर्षे बालकको पनि उपचार क्रममा मृत्यु भएको थियो। बोइङ-७३७ विमान पोर्ट सुडानबाट राजधानी खार्तुमका लागि उडेको करिब १५ मिनटपछि दुर्घटनामा परेको थियो। विमानको एक इन्जिनमा बिजुली आपूर्ति बन्द भयो। र, विमानस्थलमा फर्किने क्रममा जमिनमा बजारियो।
– सन् २०११- स्पेस सटल एटलान्टिसको अन्तिम प्रक्षेपण
सन् २०११ मा आजकै दिन अमेरिकी अन्तरिक्ष एजेन्सी नासाले स्पेस सटल एटलान्टिसको अन्तिम प्रक्षेपण गरेको थियो। स्पेस सटल एटलान्टिस नासाको सर्वाधिक सफल अन्तरिक्ष अभियान थियो। र, ३० वर्षसम्म सोही नाममा अन्तरिक्ष यान पठाएको थियो। ‘एसटीएस-१३५’ नाम दिइएको अन्तिम यान एटलान्टिस अभियानको १३५औं उडान थियो।
– सन् २०२२- जापानी पूर्व प्रधानमन्त्री सिन्जो अबेको हत्या
जापानका पूर्व प्रधानमन्त्री सिन्जो अबेमाथि आजकै दिन गोली प्रहार भएको थियो। नारा शहरमा एक सभालाई सम्बोधन गरिरहेका उनीमाथि ४१ वर्षका तेत्सुवा यामागामीले गोली प्रहार गरेका थिए। नारा मेडिकल युनिभर्सिटीको कासिहारा अस्पतालमा उपचार क्रममा उनको निधन भएको थियो।
– सन् २०२४- युक्रेनी बाल अस्पतालमा रुसी आक्रमण
सन् २०२४ मा आजकै दिन रुसले युक्रेनको राजधानी किभस्थित बाल अस्पतालमा मिसाइल आक्रमण गरेको थियो। युक्रेनकै ठूलो बाल अस्पतालमा खसेको रुसी मिसाइलका कारण ३१ जनाको ज्यान गएको थियो भने अन्य डेढ सयजना घाइते भएका थिए।
– सन् २०२५- बुल्गेरिया पनि युरोमा
सन् २०२५ मा आजकै दिन युरोपियन संसद र परिषदले बुल्गेरियालाई युरोपको साझा मुद्रा युरोलाई आधिकारिक मुद्रा बनाउन स्वीकृति दिएका थिए। सोहीअनुसार १ जनवरी २०२६ देखि बुल्गेरियाको मुद्रा लेभलाई युरोले प्रतिस्थापन गरेको थियो।
– सन् २०२५- तालिबान नेताविरुद्ध आईसीसीको एरेस्ट वारेन्ट
सन् २०२५ मा आजकै दिन अन्तर्राष्ट्रीय फौजदारी अदालत (आईसीसी)ले तालिबानका नेता हिबतुल्लाह अखुन्दाजाविरुद्ध पक्राउ आदेश जारी गरेको थियो। बालबालिका, महिला र लैंगिक अल्पसंख्यकहरू माथि अत्याचार गरेको अभियोगमा उनीविरुद्ध एरेस्ट वारेन्ट जारी गरिएको थियो।