काठमाडौं- आज ६ जुलाई। विश्व इतिहासका असंख्य घटनाले संसारभर आजको दिन स्मरण गराउँछन्। प्रस्तुत छ, केही विश्व चर्चित घटनाको सारसंक्षेप।
– सन् १९३५- दलाई लामाको जन्मदिन
चीनको स्वशासित क्षेत्र तिब्बतबाट भारतमा बस्दै आएका धार्मिक नेता दलाई लामाको आज जन्मदिन। चीनले तिब्बतमा कब्जा गरेपछि उनी भागेर भारतको हिमाचल प्रदेशस्थित धर्मशालामा बसोबास गर्दै आएका छन्। ‘स्वतन्त्र तिब्बत’ नाराका कारण चीनले उनीमाथि कडा निगरानी राख्दै आएको छ। चीन विरोधी पश्चिमा मुलुकहरूले चीन घेर्ने रणनीतिक अस्त्रका रूपमा उनको उपयोग गर्ने प्रयास जारी राखेका छन्।
– सन् १९६४- ब्रिटेनबाट मालावी स्वतन्त्र
सन् १९६४ मा आजकै दिन भूपरिवेष्ठित दक्षिणपूर्वी अफ्रिकी मुलुक मालावी बेलायती पञ्जाबाट मुक्त भएको थियो। सन् १९५३ देखि १९६३ सम्म उक्त मुलुक ब्रिटिस नियन्त्रणमा रहेको फेडेरेसन अफ रोडेसिया एन्ड न्यासाल्यान्डको अंग थियो। फेडेरेसनको विघटनपछि न्यासाल्यान्डको नाम मालावी राखिएको थियो।
– सन् २००६- सिक्किमको नाथुला पास खुला
सन् २००६ मा आजकै दिन भारतको उत्तरपूर्वी राज्य सिक्किममा पर्ने चीनसँगको नाथुला पास व्यापारिक प्रयोजनका लागि खुला भएको थियो। उक्त नाका सन् १९६२ मा भारत-चीन युद्धपछि बन्द भएको थियो। उक्त नाका पनि प्राचीन सिल्क रोडको एक अंग थियो, जसले सिक्किमलाई चीनको स्वशासित क्षेत्र तिब्बतसँग जोड्छ।
– सन् २०१३- बोइङ-७७७ को पहिलो दुर्घटना
सन् २०१३ मा आजकै दिन बोइङ-७७७ विमान पहिलोपटक दुर्घटनामा परेको थियो। दक्षिण कोरियाको इन्चन अन्तर्राष्ट्रीय विमानस्थलबाट अमेरिकाको सान फ्रान्सिस्कोका लागि उडेको आसियाना एयरलाइन्सको विमान दुर्घटनामा परेको थियो। घटनामा ३ जनाको ज्यान गयो भने अन्य १९० जना घाइते भए। सन् १९९५ मा यात्रीवाहक उडान शुरु भएयता बोइङ-७७७ विमान दुर्घटनामा परेको यो पहिलो घटना थियो। विश्वमा बोइङ-७७७ विमान दुर्घटना भएका जम्मा १२ घटना छन्।
– सन् २०१७- डेंगुबाट श्रीलंकामा २२७ को मृत्यु
सन् २०१७ मा आजको दिनसम्म डेंगुबाट २२७ जनाको ज्यान गएको थियो। त्यहाँको सरकारले देशभर फैलिएको डेंगु ज्वरोबाट त्यति ठूलो संख्यामा हताहती भएको रिपोर्ट सार्वजनिक गरेको थियो।
– सन् २०१८- जापानको बाढी र पहिरोमा गयो २०० को ज्यान
सन् २०१८ मा आजकै दिन जापानको दक्षिण-पश्चिमी क्षेत्रमा गएको बाढी र पहिरोमा परी कम्तिमा २०० जनाको ज्यान गएको थियो। उक्त प्राकृतिक विपत्तिमा परेर करिब २० लाख जनसंख्या अन्यत्र विस्थापित भएको थियो।
– सन् २०२२- अमेरिकी र बेलायती जासुस प्रमुखहरू एकै ठाउँ
सन् २०२२ मा आजकै दिन बेलायतको जासुसी संस्था एमआई-५ का प्रमुख केन म्याककालुम र अमेरिकाको फेडेरल ब्युरो अफ इन्भेस्टिगेसन (एफबीआई) निर्देशक क्रिस्टोफर रे एकसाथ देखापरेका थिए। उनीहरूले चीनलाई सबैभन्दा ठूलो आर्थिक र राष्ट्रीय सुरक्षामा खतराका रूपमा औंल्याएका थिए।
– सन् २०२५- सुरिनाममा पहिलो महिला राष्ट्रपति
सन् २०२५ मा आजकै दिन दक्षिण अमेरिकी मुलुक सुरिनामले पहिलोपटक महिला राष्ट्रपति निर्वाचित गरेको थियो। सुरिनामको संसदबाट जेनिफर गिर्लिङ्स राष्ट्रपति निर्वाचित भएकी थिइन्।