उट्पट्याङ गरेर पद गुमाएका
बडका भलमन्सालाई

भतिज ठग्गाको छानविन टोलीले
एदमै निर्दोष
दूधले नुहाएका भनेर
सफाइ दिएपछि

उनी फेरि पुरानै सिंहासनमा
टुप्लुक्क बसे !

पदबहालीको भाषणमा
छाति फुलाउँदै घोषणा गरे

जसले मेरो कुरा लगाए
उसलाई भकुर्ने छु !

मेरो विरोध गर्ने
भग्गी, लहानु, बुधनीलाई
डाँडा कटाउने छु !

यो निष्पक्ष छानविनका महानायक
मेरा प्रिय भतिज
ठग्गालाई फेरि
मेरो प्रमुख सल्लाहकार बनाउँछु !

यति सुन्‍नासाथ
पछाडिबाट कसैले सोध्यो-
हजुर छानविनमा निर्दोष
कसरी ठहरिनुभयो त !

बडका भलमन्सा मुसुक्क हाँसे
त्यो त सजिलो थियो नि

आरोप ममाथि थियो,
छानविन भतिजले गर्‍यो
अनुसन्धान नातिले गर्‍यो !

रिपोर्ट मैले पढें
निष्कर्ष हामीले मिलेर लेख्यौं

देखाऊ त
मभन्दा नैतिकवान भलमन्सा
पूरै कैलालीमा कहीं पाइन्छ ?

अब यसभन्दा निष्पक्ष छानविन
खोजेर अर्को कहाँ पाइन्छ ?
होइन भतिज ?

हो काका भन्दै
ठग्गाले डिंच्च दाँत देखायो