कैलाली । सुदूरपश्चिम प्रदेश निर्माण व्यवसायी महासंघको १८ औँ वार्षिक साधारण सभा तथा ९ औँ अधिवेशन अन्तर्गत नयाँ नेतृत्व चयनका लागि अध्यक्षमा ३ जनाको उम्मेदवारी परेको छ । अध्यक्ष सहित विभिन्न पदमा ४१ जनाले उम्मेदवारी दर्ता गराएका छन् ।
महासंघको अध्यक्ष पदका लागि लक्ष्मण कुमार स्वार, हरि प्रसाद भट्ट र किशोर ठकुराठीबीच प्रतिस्पर्धा हुने भएको छ । त्यसैगरी वरिष्ठ उपाध्यक्ष, उपाध्यक्ष, महासचिव, उपमहासचिव, कोषाध्यक्ष, सह–कोषाध्यक्ष तथा सदस्य पदहरूमा पनि बहुपक्षीय प्रतिस्पर्धा देखिएको छ ।
अधिवेशनमार्फत अध्यक्ष १, वरिष्ठ उपाध्यक्ष १, उपाध्यक्ष २, महासचिव १, उपमहासचिव (नीतिगत) १, उपमहासचिव (आन्तरिक) १, कोषाध्यक्ष १, सह–कोषाध्यक्ष १ तथा विभिन्न समूहबाट सदस्यहरू चयन गरिनेछ ।
निर्माण व्यवसायीहरूको छाता संगठनको नेतृत्वका लागि हुने निर्वाचनलाई व्यवसायीहरूले चासोका साथ हेरेका छन् । नयाँ नेतृत्वले निर्माण क्षेत्रका समस्या समाधान, व्यवसायीहरूको हकहित संरक्षण तथा प्रदेशस्तरीय निर्माण क्षेत्रको विकासमा महत्वपूर्ण भूमिका निर्वाह गर्ने अपेक्षा गरिएको छ ।
महासंघको निर्वाचन कार्यक्रम अनुसार उम्मेदवारहरू यतिबेला मतदातासँग भेटघाट तथा चुनावी प्रचारप्रसारमा व्यस्त रहेका छन् भने अधिवेशनले नयाँ नेतृत्व चयनसँगै आगामी कार्यदिशा तय गर्ने विश्वास गरिएको छ ।
