देशै बदलिदिन्छु भनेर
सबैलाई उचालेका
मने कमरेट हराएको देखेर
बडका भलमन्साले
उनलाई खोज्ने विचार गरे
र, ठग्गालाई बोलाए
भतिज हिँड, काठमाडौं जाऔं
हाम्रा कमरेटलाई खोज्न
ए काका, कहाँ खोज्न जाने ?
उनी त डेरा सारी सके !
कहाँ सरे ?
हिजोसम्म जनताको झुपडीमा थिए
अहिले ठूला बडाको संगतमा परे !
पहिले क्रान्तिको नारा घन्काउँथे,
अहिले भाषणअघि स्क्रिप्ट खोज्छन्
पहिले सामन्तवाद ढाल्छु भन्थे,
अहिले कालो शिशा पछाडि लुक्छन् !
पहिले जनता भगवान् भन्थे,
अहिले आफ्नै फोटोमा माला चढाउँछन् !
बडका भलमन्सा अचम्म परे
ए भतिज अनि कहाँ भेटिन्छन् त ?
काका कहिले पाँचतारे होटलको मिटिङमा
कहिले विदेशी दूतावासको चियामा !
अनि उनका पुराना कार्यकर्ता
अझै नारा लगाउँदै छन् काका
कमरेट भने
एसीभित्र क्रान्ति गरिरहेका छन्
बडका भलमन्साले
झुम्का छाप खैनी माड्दै भने-
भतिज
कमरेटले डेरा मात्रै होइन
आफैंलाई सारेका रहेछन् !