महोत्तरीको बर्दिबास नगरपालिका-८ मा पाँच दिनअघि मतगणनाको अन्तिम परिणाम घोषणा भयो, जसमा माओवादी केन्द्रका शम्शेरसिंह लामा वडाध्यक्ष निर्वाचित भए। पाँच दिनपछि थाहा भयो, एउटा पेटिकाको मत गणना नै छुटेको रहेछ।

फेरि उक्त मतपेटिकाको गणनापछि परिणाम आयो, एमालेका रुद्रसिंह किङगरिया र शम्शेरको मत बराबरी ७६७ आयो। त्यसपछि गोला प्रथाबाट निर्णय गर्ने सहमति जुट्यो। यतिबेला लामाको भाग्य बलियो देखियो। र, गोलाप्रथाबाट उनी नै वडाध्यक्ष घोषित भए।

बर्दिबासका १३ वटा वडाको गणना सकेर अन्तिम वडाको मतपेटिका निकाल्ने क्रममा वडा नम्बर ८ को थप मतपेटिका फेला परेको थियो। उक्त मतपेटिका अर्कै वडाको पोकामा परेको रहेछ। खासमा बर्दिबास–८ बेलगाछीमा दुईवटा मतपेटिका थिए। एउटाको मात्र मत गनेर अन्तिम नतिजा सार्वजनिक भएको थियो।

मतदान अधिकृत, कर्मचारी र राजनीतिक दलले समेत मत गणनाअघि उक्त केन्द्रका दुईवटा पेटिका रहेको ख्याल गरेनन्। र, बर्दिबास–८ का नौवटा मटपेटिकामध्ये आठवटाको मात्र गणना गरेर परिणाम सार्वजनिक गरियो।

अधुरो मत गणना गरेर माओवादी केन्द्रका शम्शेरसिंह लामा वडाध्यक्ष निर्वाचित भएको घोषणा गरिएको थियो। र, फेरि मतगणना अनि गोलाप्रथाबाट लामा नै अध्यक्ष बने।