झुम्का छाप खैनी नपाएको
धेरै दिन भयो
बडका भलमन्सा
खैनी किन्न तिकुनियातिर लागे
सिमानामा हेरेको त
अरू सर्वसाधारणभन्दा पुलिस कै भिड
तिकुनिया पुगे चार पोका झुम्का किने
आफ्नो झोला ठग्गालाई बोकाए
सिमानामा पुगेको त
झोला खोसाखोस गर्दै गरेका पुलिस
ठग्गालाई छेउमा बोलाए
कानेखुशी गर्दै भने
ए भतिज बुद्धि लगा
नत्र खैनी पनि जाने भो !
ठग्गाले आँखा घुमायो
छिट्टै जुक्ती निकाल्यो
बाजे झुम्का खैनीलाई
धूप भनेर लुकाऊँ
धार्मिक सामान भन्यौं भने
शायद कसैले नछोला !
उताबाट आवाज आयो-
ए के बोकेको छ झोलामा ?
झोला तानेर जाँच गर्न थाल्यो
ठग्गा अलमलियो
बडका भलमन्सा थर्थराए
मनमनै बुदबुदाए
हे सरकार
अब त खैनीको पनि भन्सार तिर्नुपर्ने भो
झोला खोलियो विस्तारै
चार पोका झुम्का चम्किए
पुलिस हाँस्यो
बडका भलमन्सा तस्करी ?
बडका भलमन्सा रिसाए
तर, शब्द गलामै अड्कियो
भजनीकी लौटी रुँदै कराई
हाम्रो मट्टीको तेल खोस्ने
महँगी धानी सक्दो छैन
खोजेको सामान नपाएर
पारी जानुपर्ने बाध्यता
सिमानाको धुलो उडिरह्यो
मन भारी गर्दै
खाली झोला भरिएको
आक्रोश लिएर
बडका भलमन्सा विस्तारै
साँडेपानीतिर लागे !