काठमाडौं/जापान — नेपाली क्रिकेटर विकास खड्काले जापानमा जारी क्रिकेट प्रतियोगितामा अविश्वसनीय प्रदर्शन गर्दै इतिहास रचेका छन्। कम्युनिटी कपअन्तर्गत ४० ओभरको खेलमा टोकियो डेयरडेभिल्स विरुद्ध उनले मात्र १२९ बलमा अविजित ३०९ रनको विस्फोटक पारी खेलेका हुन्।
उनको यो प्रदर्शन जापान क्रिकेट इतिहासकै सर्वाधिक व्यक्तिगत स्कोरका रूपमा दर्ज भएको छ, जसले नेपाली क्रिकेटको नाम अन्तर्राष्ट्रिय स्तरमा उचो बनाएको छ।
जापान क्रिकेट एसोशियशनले समेत आफ्नो फेसबुक पेजमा फोटो राख्दै जापान क्रिकेटमै ऐतिहासिक भन्दै बिकासको खेलको तारिफ गरेको छ ।
खड्काले उक्त खेलमा २९ छक्का र २५ चौकाको वर्षा गर्दै विपक्षी बलिङ आक्रमणलाई पूर्ण रूपमा ध्वस्त पारे। उनले अप्रिल १८ मा सम्पन्न खेलमा साइतामा रोयल्सबाट खेल्दै यस्तो ऐतिहासिक इनिङ्स खेलेका थिए, जुन साँच्चिकै दुर्लभ र प्रेरणादायी उपलब्धि हो।
आफ्नो उत्कृष्ट प्रदर्शनपछि प्रतिक्रिया दिँदै खड्काले जापानकै क्रिकेट इतिहासमा आफ्नो र देशको नाम लेखाउन पाउँदा अत्यन्त खुशी लागेको बताए। “यो मेरो लागि मात्र होइन, सम्पूर्ण नेपाली क्रिकेटका लागि गर्वको क्षण हो,” उनले भने।
सुदूरपश्चिमको धनगढी उपमहानगरपालिका–४ स्थायी घर भएका खड्का सन् २०२४ मा स्टुडेण्ट भिसामा जापान पुगेका हुन्। पढाइसँगै क्रिकेटलाई निरन्तरता दिँदै आएका उनले यसअघि यू–१९ प्रतियोगितामा टोकियो टाइटन्सबाट खेल्दै शतकीय पारीसमेत खेलेका थिए।
उनको यो कीर्तिमानी इनिङ्स अब जापान क्रिकेट इतिहासमा अहिलेसम्मकै उच्च व्यक्तिगत स्कोरका रूपमा स्थापित भएको छ, जसले युवा खेलाडीहरूलाई नयाँ प्रेरणा दिएको छ।
