दुबईबाट
बिरामी बुवाको
औषधि उपचारका लागि
छुट्टीमा घर आएको रामदुलारे !
चुनावको होहल्लाले
छुनै सकेन उसलाई
कहिले ट्र्याक्टरको
धुलाम्मे गर्जन,
कहिले मोटरसाइकलको हल्ला
कहिले मोटरको भकभक !
कहिले जिन्दावाद
कहिले मुर्दावाद
यी आवाजहरू
उसको जीवनसँग
कहिल्यै मेल खाएनन् !
अचानक
लगातार जित्दै आएका
मन्त्री रामभरोसेको
चिरपरिचित स्वर आयो,
तिमी आएको रहेछौ
जाने बेला
मलाई भोट हालेरै जानू !
रामदुलारे एकछिन रोकियो
उसले सम्झियो
घर छाड्नुपरेका दिन,
ऋण काढेर
विदेशिनुपरेको बाध्यता
बुवाको ओछ्यान
श्रीमतीको आँसु
र, आफ्नै पसिनाले
तिरेको हरेक किस्ता !
उसले सम्झियो
चुनाव त लड्ने
तर, गाउँका लागि
केही नगर्ने
भ्रष्ट रामभरोसेलाई !
विदेशमा पढ्दै गरेका
उसका छोराछोरी,
महँगो गाडी,
काठमाडौं र गाउँमा
ठडिएका महलहरू !
र, आफ्नो झुपडीभित्र
थोत्रो बाकसभित्र राखेका
ऋणका तमसुख !
उसले फेरि सम्झियो
यदि समयमै
दुबई नपुगे
के हुन्छ ?
काम जान्छ,
ऋण थपिन्छ
बुवाको उपचार रोकिन्छ !
त्यसैले
रामदुलारेले
नारा रोजेन,
झण्डा बोकेन,
भोट पनि दिएन
ऊ चुनाव छाडेर
फेरि दुबईतिर लाग्यो
देश बदल्ने सपना होइन,
आफ्नो परिवारको भविष्य
बचाउने हतारमा !