कैलाली । फुटबलप्रतिको मोह, संघर्षको कथा र भविष्यको सपना बोकेका किशोर खेलाडीहरूले धनगढी रंगशालालाई जीवन्त बनाएका छन्। बद्री कुन्ता मेमोरियल यु–१६ कैलाली जिल्लास्तरीय पुरुष फुटबल प्रतियोगिता पौष १८ गतेदेखि जारी छ । पौष २६ गतेसम्म चल्ने यस प्रतियोगिताले धनगढीलाई मात्र होइन, समग्र कैलालीलाई फुटबलमय बनाएको छ।

कैलाली जिल्ला फुटबल संघको आयोजनामा तथा बद्री कुन्ता मेमोरियल ट्रष्टको मुख्य प्रायोजनमा सञ्चालन भइरहेको प्रतियोगितामा कैलाली १३ स्थानित तह मध्ये जानकी गाउपालिका बाहेक सबै पालिकाका गरि १२ टिम सहभागी छन्। संघका अध्यक्ष अनिल मल्लका अनुसार बद्री कुन्ता मेमोरियल ट्रष्टको आर्थिक सहयोग, सीमित स्रोत र राज्यको प्रत्यक्ष लगानीबिनै पनि प्रतियोगिता सम्भव बनाइएको हो।

“प्रतियोगितालाई सफल बनाउन आ–आफ्नो स्थानबाट सहयोग गर्ने सबै प्रायोजक, सह–प्रायोजक, अफिसियल, खेलाडी, प्रशिक्षक, दर्शक र सुरक्षाकर्मीलाई धन्यवाद,” अध्यक्ष मल्ल भन्छन्।

राज्यको लगानी नहुँदा पनि विभिन्न क्लब र समुदायको सहयोगमा खेलाडीहरू मैदानमा उत्रिएका छन्। यही सहकार्यको भावनाले यो प्रतियोगिता सम्भव भएको बद्री कुन्ता मेमोरियल ट्रष्टका संस्थापक सदस्य गोकर्ण जोशी बताउँछन्।
“यस क्षेत्रको फुटबल विकासमा केही इँटा थप्न सकिन्छ कि भनेर हामी कैलाली जिल्ला फुटबल संघसँग जोडिएका हौँ,” जोशीको भनाइ छ।

स्थानीय तह पनि सहकार्यतर्फ अघि बढ्ने संकेत देखिन्छ। मोहन्याल गाउँपालिका उपाध्यक्ष कमल सावद भन्छन्, “कैलाली जिल्ला फुटबल संघसँग साझेदारी गर्दै मोहन्याल क्षेत्रमा फुटबल गतिविधि बढाउँछौँ।”

प्रतियोगिताको स्तरले खेलाडी मात्र होइन, क्लब पदाधिकारीहरूलाई पनि उत्साहित बनाएको छ। साहारा युवा क्लब पहलमानपुरका अध्यक्ष निर्मल कुमार मिश्र भन्छन्, “यति स्तरीय प्रतियोगिता सायदै हुन्छन्, हामी अत्यन्त खुशी छौँ।”

संघर्षका कथाहरू भने अझै मार्मिक छन्। बसर युवा क्लब चुरेका अध्यक्ष गणेश देउवा भन्छन्, “केटाहरू भन्थे—हामीलाई त चप्पल लगाएर खेल्न सजिलो हुन्छ दाइ। धेरै मिहिनेत गरेर टिमलाई धनगढी रंगशालामा उतारेको हुँ।”

प्रशिक्षकहरूको अनुभव पनि सिकाइले भरिएको छ। साहारा युवा क्लबका मुख्य प्रशिक्षक प्रदिप बमका अनुसार, “प्रतियोगिताको स्तर एक तह माथि छ, हामी धेरै कुरा सिकिरहेका छौँ।”

खेलाडीहरूको अनुभूति झनै हृदयस्पर्शी छन्। बसर युवा क्लब चुरेका खेलाडी खेम बोहरा भन्छन्, “मैले पहिलो पटक फुटबल जुत्ता लगाएँ। पहाडमा खेल्नुपर्ने जुत्ता पनि हुदैनथ्यो । हामी पहाडका मान्छे बलिया हुन्छौँ, त्यसैले त्यहाँ खाली खुट्टै खेल्थ्यौँ।”

गाउँबाट आएका टिमका लागि यो अवसर सपनाजस्तै बनेको छ। बर्दगोरिया स्पोर्ट्स एण्ड इभेन्ट्सका सहायक प्रशिक्षक प्रकाश शाह भन्छन, “गाउँबाट पहिलो पटक यति व्यवस्थित प्रतियोगितामा भाग लिन पायौँ, हाम्रो लागि यो ठूलो उपलब्धि हो।”

प्रतियोगितालाई उत्कृष्ट बनाउन आयोजक पक्षले कुनै कसर बाँकी नराखेको प्रतियोगिता निर्देशक हर्क दानपालीको भनाइ छ। “बद्री कुन्ता मेमोरियल यु–१६ प्रतियोगितालाई नमुना बनाउने हाम्रो लक्ष्य हो,” उनी भन्छन्।

धनगढी रंगशालामा अहिले केवल फुटबल खेलिँदैन, यहाँ संघर्ष, सम्भावना र सपनाहरू दौडिरहेका छन्। तर प्रश्न अझै उस्तै छ—
युवाले आफैं भविष्य खोजिरहँदा, राज्य कहिले मैदानमा उत्रिने ?