लन्डन (बीबीसी)- महिलाहरूमा हुने क्यान्सरको लक्षण शुरुवाती चरणमै पत्ता लगाउन सकिने एक अध्ययनले देखाएको छ।
हेल्थ जर्नल ‘द लान्सेन्ट’मा प्रकाशित भएको उक्त अध्ययनको रिपोर्टअनुसार नियमित जाँच गराउने हो भने महिलामा हुने क्यान्सरहरू शुरुमै पहिचान गर्न सकिन्छ।
कम र मध्यम आयस्तरका मुलुकहरूमा स्तन र सर्भाइकल क्यान्सरबाट पीडित महिलाहरू मध्ये २० प्रतिशतभन्दा कम बिरामीको पहिचान शुरुवाती चरणमै पत्ता लगाउन सकिने अध्ययनले देखाएको छ। उच्च आयस्तरका मुलुकहरूमा भने हरेक ५ मध्ये २ महिलाहरूमा हुन लागेको क्यान्सर प्रारम्भिक चरणमै डिटेक्ट गर्ने गरिएको छ।
तथापि, अध्ययनअनुसार कम आयस्तरका मुलुकहरूमा अधिकांश महिलामा देखिने क्यान्सर बिरामी धेरै जटिल भएपछि मात्र पहिचान हुने गरेको छ। र, त्यस्तो अवस्थामा महिलाहरू जीवित रहने सम्भावना कमजोर हुन्छ। विकसित मुलुकहरूमा भने शुरुवाती चरणमै रोग पहिचान हुने हुनाले जीवित रहने सम्भावना अधिक रहन्छ।
‘भेनस क्यान्सर प्रोजेक्ट’ अन्तर्गत लन्डन स्कुल अफ हाइजिन एन्ड ट्रपिकल मेडिसिनले उक्त अध्ययन गरेको हो। क्यान्सर सर्भाइभल ग्रुपका शोधकर्ताहरूले ३९ मुलुकका २ लाख ७५ हजारभन्दा बढी महिलाको तथ्यांक विश्लेषण गरेको थियो।
त्यसमा डायग्नोसिस, उपचार र अन्तर्राष्ट्रीय दिशानिर्देश पालनासम्बन्धी टुल्सहरूको मूल्यांकन गरिएको थियो। कम र मध्यम आयस्तरका मुलुकहरूमा प्राथमिक स्वास्थ्य ढाँचाहरूमा कमी, स्क्रिनिङ सुविधाहरूको अभाव र सामाजिक अवरोधहरूका कारण महिलाहरूमा हुने क्यान्सर ढिलो पत्ता लाग्ने गरेको शोधकर्ताहरूले निष्कर्ष दिएका छन्।