नयाँदिल्ली- संसारका १८० करोड मानिसले नजिकको वस्तु देख्दैनन् । तीमध्ये अधिकांश ४० वर्ष उमेर कटेकाहरू छन् । र, उनीहरूलाई देखिएको समस्या प्रेसबिओपिया हो ।
प्रेसबिओपिया भनेको नजिकको वस्तु नदेख्ने समस्या हो । त्यस्तो समस्या भएका मानिसका आँखामा चश्मा हुन्छ । तर, चश्माभन्दा माथिबाट टाढाका वस्तु हेर्छन्, चश्माबाट भने आँखा नजिक रहेका वस्तु, किताब या ग्याजेट हेरिरहेका हुन्छन् ।
प्रेसबिओपिया एक उमेरसम्बन्धी समस्या हो । र, यो ४० वर्ष उमेर कटेपछि नै बढी देखिन्छ । जब आँखाको लेन्सको इलास्टिसिटी कम हुन्छ, प्रेसबिओपियाको समस्या शुरु हुन्छ । यसमा सुधारका लागि चश्मा, कन्ट्याक्ट लेन्स र सर्जरीजस्ता विकल्प उपलब्ध छन् ।
प्रेसबिओपिया हुँदा आँखाको फोकस बदल्ने क्षमता समाप्त हुँदै जान्छ । र, कुनै नजिकको वस्तु हेर्न, पढ्न र लेख्न समस्या हुन थाल्छ । संसारका १८० करोड मानिसमा यो समस्या रहेको रिपोर्ट ‘नेसनल लाइब्रेरी अफ मेडिसिन’मा प्रकाशित भएको हो ।
प्रेसबिओपियाका लक्षण यस्ता
– पढ्नका लागि अधिक उज्यालो आवश्यक हुन्छ
– सामान्य दूरीमै अक्षर धमिलो देखिन्छ
– स-साना अक्षर पढ्न समस्या हुन्छ
– कुनै वस्तु आँखा नजिक ल्याउँदा धमिलो देखिन्छ
– पढ्नका लागि कम्तिमा एक हातको दूरीमा राख्नुपर्छ
– नजिक हेर्ने कोशिस गर्दा टाउको दुख्न सक्छ
– नजिकको वस्तु हेर्न आँखालाई हल्का बन्द गर्नुपर्ने हुन सक्छ
कारण के के ?
– एनिमिया
– कार्डियो भास्कुलर बिरामी
– डाइबिटिज
– आँखाकै कुनै बिरामी
– रक्त सञ्चार कमजोर हुनु
– माइस्थेनिया ग्रेभिस नामक अटोइम्युन बिरामी, जसबाट शरीरका मांशपेशी कमजोर हुन्छन्
यी औषधि पनि कारक
– एन्टी एन्जाइटी औषधि (चिन्ता या घबराहटको औषधि)
– एन्टी डिप्रेसेन्ट (डिप्रेसनको औषधि)
– एन्टी हिस्टामाइन्स (एलर्जीको औषधि)
– एन्टी साइकोटिक्स (मनोविकारको औषधि)
– डायुरेटिक्स (मूत्रसम्बन्धी विकारको औषधि)
कसरी बच्ने ?
– आँखाको नियमित जाँच गराऊँ
– डाइबिटिज या उच्च रक्तचापलाई व्यवस्थापन गरौं
– चर्को घाममा सनग्लास लगाऊँ
– एन्टी अक्सिडेन्ट्सका लागि सबै रंगका सागसब्जी र फलफूल खाऊँ
– ‘भिटामिन ए’ प्राप्त गर्न हरिया सागसब्जी, दुग्धजन्य पदार्थ र माछा खाऊँ
– बिटा केरोटिनका लागि गाँजर, पालक, टमाटर, सखरखण्ड, ब्रोकाउली खाऊँ
– सही पावरको चश्मा लगाइरहेको छु भन्ने सुनिश्चित गरौं
– पढ्न बसेको समयमा कोठामा राम्रो उज्यालोको व्यवस्था गरौं
(भास्कर डट कमबाट)