भैरहवी । विश्व पर्यटन दिवस २०८२ लुम्बिनी, बेलहिया र रुपन्देहीमा विशेष उत्साहका साथ मनाइयो। लुम्बिनी विकास कोष र लुम्बिनी युथ इन्टरप्रेनर्स डेभलपमेन्ट फोरमले मायादेवी मन्दिर अगाडि कार्यक्रम आयोजना गरी आन्तरिक तथा विदेशी पर्यटकलाई स्वागत गरे। परम्परागत बाजा, नेपाली भेषभूषा र युवाको सक्रिय सहभागिताले कार्यक्रमलाई साँच्चिकै उत्सवमय बनाएको थियो।
कार्यक्रममा विदेशी पाहुनालाई खादा, फोटो फ्रेम र स्वागत चिनोसहित सम्मान गरिएको थियो। लुम्बिनी विकास कोषका वरिष्ठ निर्देशक ज्ञानिन राईले लुम्बिनी केवल धार्मिक स्थल नभई मानव सभ्यताको साझा सम्पदा भएको बताए। वरिष्ठ सूचना अधिकृत राजन बस्नेतले कार्यक्रमले स्थानीय समुदाय र पर्यटकबीचको सांस्कृतिक सेतु तयार गर्ने विश्वास व्यक्त गरे।
त्यस्तै, बेलहियामा पनि विदेशी पर्यटकलाई विशेष स्वागत गरिएको थियो। भारत र अन्य देशबाट आएका चार जना पर्यटकलाई खादा, माला र बुद्ध चिनोसहित सम्मान गरियो। अष्ट्रेलियाकी बारबरा डोरा भन्छिन्, “नेपाल घुम्न आउँदा बोर्डरमै यस्तो स्वागत पाउँदा म अत्यन्तै खुसी छु।” नेदरल्याण्डका मार्सल कैयवर पनि नेपाल प्रवेशमै गरिएको सत्कार देखेर दङ्ग परेका थिए।
लुम्बिनी प्रदेशका प्रमुख सचिव बाबुराम अधिकारीले भने, “पर्यटन नेपालको आर्थिक समृद्धिको आधार हो। विदेशी पाहुनालाई स्वागतमा सबैले विशेष ध्यान दिनुपर्छ।” पर्यटन व्यवसायी सागर अधिकारीले गुणस्तरीय पर्यटकको बसाई लम्बाउन सके मात्र नेपालको पर्यटन विकास हुने बताए।
यसैबीच, होटल तथा रेष्टुरेन्ट व्यवसायी संघ बुटवलले पनि पर्यटन दिवसको अवसरमा मोटरसाइकल र्याली आयोजना गरी आन्तरिक पर्यटन प्रवद्र्धनमा योगदान पुर्यायो। व्यवसायीहरूले कार्यक्रमका क्रममा पर्यटकहरूसँग अन्तरक्रिया गर्दै नेपाल भ्रमणको अनुभव अविस्मरणीय बनाउने प्रयास गरे।
रुपन्देहीमा पनि होटल तथा रेस्टुरेन्ट व्यवसायी संघ रुपन्देहीले मोटरसाइकल र्याली र अन्तरक्रिया कार्यक्रम सम्पन्न गर्यो। संघमा आवद्ध व्यवसायीहरूले “नेपाल सुरक्षित गन्तव्य” अंकित टिसर्ट लगाएर र्यालीमा सहभागिता जनाए। बुटवलबाट सुरु भई बेलहिया पुगेको ¥यालीमा स्थलमार्गबाट आएका सात जना पर्यटकलाई खादा, माला र नेपाली ढाकाटोपीसहित स्वागत गरिएको थियो।
कार्यक्रममा रुपन्देही जिल्ला प्रशासन कार्यालयका प्रमुख टोकराज पाण्डेले व्यवसायीहरूलाई पेशामा निर्धक्क अगाडि बढ्न आग्रह गरे। उनले सुरक्षा निकाय र प्रशासनले निरन्तर सहकार्य गर्दै आएको बताउँदै पर्यटन क्षेत्रमा देखिने कुनै समस्या समाधानमा लागिपर्ने प्रतिबद्धता व्यक्त गरे।
नाटा लुम्बिनी प्रदेशका सल्लाहकार कृष्ण प्रसाद अधिकारी (सागर)ले नेपाल गुणस्तरीय र सस्तो पर्यटन गन्तव्य भएको बताए। भौगोलिक बनावट र नीति अनुसार मास पर्यटनभन्दा गुणस्तरीय पर्यटनमा जोड दिनुपर्ने र डान्सबार तथा क्यासिनोमा दिइने सेवासुविधामा विशेष ध्यान दिनुपर्ने उनले बताए। नाटा रुपन्देहीका अध्यक्ष चन्द्र बहादुर थापाले भने, देशमा पर्यटन प्रवद्र्धन जस्तो साझा विषयलाई सरोकारवालाबीच समन्वय आवश्यक रहेको बताए।
संघका अध्यक्ष माधव खनालले पर्यटन दिवसको अवसरमा रुपन्देहीका सम्पूर्ण होटलहरूमा असोज ११–१७ गतेसम्म लजिङ र फुडिङमा १५ प्रतिशत छुट दिने घोषणा गरे। उनले भने, “यसले सामाजिक सञ्जालमा फैलिएका नकारात्मक प्रचारलाई खण्डन गर्दै नेपालको पर्यटन छविलाई बलियो बनाउन मद्दत पुर्याउनेछ।”
विश्व पर्यटन दिवसको अवसरमा लुम्बिनी, बेलहिया र रुपन्देहीमा गरिएको स्वागत, मोटरसाइकल ¥याली, अन्तरक्रिया कार्यक्रम र होटल छुट योजनाले फेरि प्रमाणित गर्यो कि पर्यटन नेपालको शान्ति, संस्कृति र समृद्धिको मूल आधार हो। यस अवसरले स्थानीय युवाहरू, व्यवसायी र प्रशासनको सक्रियता मार्फत नेपालको पर्यटन छवि विश्वसामु उजागर भएको छ।