काठमाडौं- नवलपरासी(पश्चिम) रामग्राम नगरपालिका-१० नदुवा चोकस्थित सडकमा हाल नम्बर नखुलेको टिपरले लु.४९ प ५३६८ नम्बरको मोटरसाइकललाई बुधबार साँझ ठक्कर दिँदा मोटरसाइकल चालक रामग्राम नगरपालिका-६ पोखरापाली बस्ने ४० वर्षीय हरिद्धार यादवको घटनास्थलमै मृत्यु भएको छ । शंकास्पद २ वटा टिपरलाई प्रहरीले नियन्त्रणमा लिएर अनुसन्धान गरिरहेको छ ।
मोरङ सुन्दरहरैचा नगरपालिका-९ आदर्श चोकस्थित सडकमा को.३५ प ७१३८ र प्रदेश १-०२-०४४ प ६३४२ नम्बरका दुई मोटरसाइकल एकआपसमा ठक्कर खाई बुधबार साँझ दुर्घटना हुँदा प्रदेश १-०२-०४४ प ६३४२ नम्बरको मोटरसाइकल चालक सोही नगरपालिका-९ बस्ने ३५ वर्षीय नवराज राईको मृत्यु भएको छ । दुर्घटनामा गम्भीर घाइते भएका उनको गोल्डेन अस्पताल बिराटनगरमा उपचारको क्रममा मृत्यु भएको हो । दुर्घटनामा घाइते भएका को.३५ प ७१३८ नम्बरको मोटरसाइकल चालक सोही नगरपालिका-११ बस्ने २८ वर्षीय बिमल ईजम र सोही मोटरसाइकलमा सवार सोही नगरपालिका-९ बस्ने ३२ वर्षीय ईन्द्र कुमार लिम्बुको न्यूरो अस्पताल बिराटनगरमा उपचार भइरहेको छ ।