काठमाडौँ । नेत्र विक्रम चन्द ‘विप्लव’ नेतृत्वको नेकपाबाट विभाजन भई बनेको नयाँ पार्टी नेकपा (बहुमत)का संयोजक धर्मेन्द्र बास्तोला पक्राउ भएसँगै पार्टीले आफ्नो धारणा सार्वजनिक गरेको छ । पार्टीले आफूहरू निर्वाचन बहिष्कारको नीतिमा नरहेको धारणा सार्वजनिक गरेको हो ।

राजनीतिक प्रशिक्षण सकेर बाँकेस्थित घरमा जाँदै गर्दा उनलाई प्रहरीले पक्राउ गरेको थियो । बुटवलमा भएको बम बिस्फोटसँग जोडेर बस्तोलालाई षड्यन्त्रपूर्वक ढंगले पक्राउ गरेको भन्दै स्पष्टीकरण दिएको हो ।

‘कञ्चन पोखराबाट प्रशिक्षण सकी बाँकेस्थित घरमा जाँदै गर्दा बुटवलमा बम विस्फोट गराइनु र उहाँलाई गिरफ्तार गर्नु सुनियोजित षड्यन्त्र रहेको कुरा स्पष्ट छ,’ नेकपा बहुमतका केन्द्रीय कार्यालय सदस्य हेमन्तप्रकाश वलीले विज्ञप्ति जारी गर्दै भनेको छ ।