लमजुङ । जिल्लाको सुन्दरबजार नगरपालिका ४ का ४४ वर्षीय खुमबहादुर मौरतीको आफैँले पालेको राँगाले हान्दा मृत्यु भएको छ ।

राँगोले हानेर गम्भीर घाइते उनको बेँसी शहरस्थित जिल्ला अस्पतालमा उपचार हुन नसकेपछि थप उपचारका लागि चितवन मेडिकल कलेज भरतपुरमा लैजाने क्रममा बाटोमै मृत्यु भएको जनाइएको छ ।

जिल्ला प्रहरी कार्यालयका प्रहरी निरीक्षक जगदिश रेग्मीका अनुसार राँगाले शनिबार खुमबहादुरकी १९ वर्षीया छोरी रविनालाई समेत घाइते बनाएको थियो ।

उनीको जिल्ला अस्पतालमा उपचार भइरहेको छ । थप घटना हुन नदिनका लागि प्रहरीले राँगालाई गोली हानेर मारेको छ ।

राँगाले केही दिनअघिबाटै दिमाग ठीक नभएको स‌ंकेत गरे पनि आफैँले पालेको राँगाले केही नगर्ला भनेर राँगा समात्न जाँदा सो घटना हुन पुगेको स्थानीयवासीको भनाइ छ ।