भैरहवा- रुपन्देहीको सिद्धार्थनगर नगरपालिका-१ बेलहियामा निर्माणाधीन अवस्थामा रहेको एक जीर्ण होटललाई धितो राखेर नेपाल बैंक लिमिटेडबाट १ अर्ब ७७ करोड रुपैयाँ ऋण निकाल्ने प्रयास भएको खुलासा भएको छ। यो विवादास्पद ऋण प्रकरणमा नेपाल बैंकका पूर्व अध्यक्ष डा. चन्द्रबहादुर अधिकारीसमेत मुछिएका छन्।
पाँच वर्षअघि पर्यटन व्यवसायी सीपी श्रेष्ठबाट बुटवलका व्यवसायी बालकृष्ण भुसालले करिब ६० करोड रुपैयाँमा खरिद गरेको उक्त होटल करिब २ बिगाहा १५ कठ्ठामा फैलिएको छ। यद्यपि, निर्माण कार्य अलपत्र भएपछि अहिले होटलको संरचना जीर्ण भइसकेको छ। र, ‘भूत बंगला’झैं देखिने अवस्थामा पुगेको छ।
तर, त्यस्तै होटललाई आधार बनाएर नेपाल बैंकबाट १ अर्ब ७७ करोड रुपैयाँ ऋण स्वीकृत गराउने प्रक्रियामा संलग्न भएको आरोपमा पूर्व अध्यक्ष अधिकारीमाथि अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको हो।
आयोगका अनुसार अधिकारीले ऋण स्वीकृत गराइदिने नाममा व्यवसायी भुसालसँग १७ लाख रुपैयाँ घुस लिएका थिए। सो रकम भुसालका कान्छा छोरा अंकित भुसालमार्फत अधिकारीले लिएको अख्तियारको दाबी छ।
यस प्रकरणमा भुसाल हस्पिटालिटी प्रालिको ‘र्याडिसन होटल प्रोजेक्ट’का सञ्चालक बालकृष्ण भुसालसहित उनका छोराहरू अमृत र अंकित भुसालविरुद्ध पनि भ्रष्टाचार मुद्दा दायर गरिएको छ।
अधिकारीमाथि यसअघि पनि अन्य व्यवसायीहरूसँग करोडौं रुपैयाँ असुली गरेको आरोप लाग्दै आएको थियो। उनले आफूलाई नेपाल राष्ट्र बैंकका गभर्नरको निकट व्यक्ति भन्दै देशभर ऋण स्वीकृत गराइदिने नाममा रकम संकलन गर्दै आएको समेत अनुसन्धानबाट खुल्न आएको अख्तियारले जनाएको छ।