काठमाडौँ । गोरखाको पालुङटार नगरपालिकामा सत्ता गठबन्धन दल नेपाली कांग्रेस र जनता समाजवादी पार्टी (जसपा)बीच तालमेल टुटेको छ ।

जिल्ला स्तरमा दुई दलका नेताहरूबीच सहमति हुन नसकेपछि चुनावी तालमेल नहुने भएको हो । केन्द्रीय नेतृत्वले पालुङटारमा कांग्रेसले जसपाका मेयरलाई सहयोग गर्ने सहमति गरेको थियो ।

कांग्रेसका जिल्ला सभापति नन्दप्रसाद न्यौपाने आज एक विज्ञप्ति जारी गर्दै केन्द्रको निर्देशन बमोजिम जिल्लामा वडा तहसम्म तालमेल गर्ने प्रयास भए पनि दुवै दलले एक्ला एक्लै प्रतिस्पर्धामा जाने निर्णय गरेको जानकारी दिएका छन् ।

यसअघि कांग्रेस र जसपाको शीर्ष नेतृत्वबीच पालुङटारको मेयरमा जसपालाई र उपमेयरमा कांग्रेसलाई हुने सहमति भएको थियो ।

कांग्रेस जिल्ला सभापति न्यौपानेले पालुङटारमा कांग्रेस एक्ल निर्वाचनमा जाने भन्दै नगरबासीलाई भोट दिन आग्रह गरेका छन् ।