काठमाडौँ । काभ्रेको रोशी गाउँपालिका ११ स्थित बिपी राजमार्गमा आज दिउँसो दुई गाडी आपसमा ठोकिँदा पाँच जनाको मृत्यु भएको छ । घटनामा १८ जना घाइते भएको प्रहरीले जनाएको छ ।
जिल्ला प्रहरी कार्यालयका प्रहरी नायब उपरीक्षक हरि खतिवडाका अनुसार भारतीय तीर्थयात्री लिएर काठमाडौँबाट भारततर्फ जाँदै गरेको युपी ५८ टी ८१८१ नम्बरको फोर्स गाडी र सिन्धुलीबाट काठमाडौँतर्फ आउँदै गरेको ना १ ज ४२१० नम्बरको टाटासुमो एक आपसमा ठोकिएको हो । घटनामा सुमोमा सवार पाँच जनाको मृत्यु भएको हो ।
घटनामा परी मुत्यु हुनेमा सिन्धुली कमलामाई नगरपालिका ७ बस्ने वर्ष ३० का विक्रम श्रेष्ठ, सोही नगरपालिका ४ बस्ने वर्ष ४५ का हरिबहादुर बल, सुनकोशी गाउँपालिका १ बस्ने वर्ष ४४ का प्रमिला नेपाली, रामेछाप जिल्ला खाँडादेवी गाउँपालिका ८ बस्ने वर्ष ३० का सम्झना भुसाल र निजको छोरा वर्ष ६ को संगीत भुसाल रहेको प्रहरीले जनाएको छ ।
दुर्घटनामा अन्य १८ जना भएको र उनीहरूको धुलिखेल अस्पतालमा उपचार भइरहेको प्रहरीले जनाएको छ । प्रहरीले दुवै गाडीलाई नियन्त्रणमा लिएर घटनाको थप अनुसन्धान गरिरहेको प्रहरी नायब उपरीक्षक खतिवडाले बताए ।
