नयाँदिल्ली- जिन्दगीमा सबै ठीकठाक चलिरहेको छ। कुनै समस्या छैन। स्वास्थ्य विलकुल ठीक छ। तर, नियमित जाँचमा चिकित्सकले तपाईंको रक्तचाप उच्च भएको छ, हैरानी हुन सक्छ।
त्यसभन्दा बढी आश्चर्यमा पार्ने कुरा हो, उच्च रक्तचाप बढ्दै गर्दा तपाईंको रगतमा ब्लड सुगर पनि बढ्दो क्रममा देखिन्छ। खासमा, उच्च रक्तचापको सीधा कनेक्सन इन्सुलिन रेजिस्टेन्ससँग हुन्छ। र, त्यसले टाइप-२ डाइबिटिज हुन सक्छ।
तपाईंको मनमा जिज्ञासा उत्पन्न हुन्छ, इन्सुलिन रेजिस्टेन्स किन बढिरहेको छ ? यसका धेरै कारण हुन्छन्। उच्च रक्तचाप र फ्याट्टी लिभरका कारण यो समस्या हुन सक्छ।
यी सबै अवस्थामा शरीरको मेटाबोलिजम प्रभावित हुन सक्छ। सोही कारण इन्सुलिनले ठीक ढंगले काम गर्न छाडिदिन्छ। र, विस्तारै ब्लड सुगर बढ्न थाल्छ।
हाम्रो शरीरले ऊर्जाका लागि ग्लुकोजको प्रयोग गर्छ, जो खानाबाट प्राप्त हुन्छ। ग्लुकोजलाई इन्सुलिन नामक हर्मोनले कोशिकाहरूसम्म पुर्याउँछ। जब शरीरमा इन्सुलिन नामक चाबी सहजै खुल्दैन, ग्लुकोज अर्थात् सुगर रगतमै जम्मा हुन थाल्छ। र, ब्लड सुगर बढ्न पुग्छ।
लो एस्ट्रोजन लेभलको अवस्था, फ्याट्टी लिभर हुँदा, महिलामा महिनावारी सुक्दा, उच्च रक्तचापका कारण र हाइपोथाइराडिजम हुँदा इन्सुलिन रेजिस्टेन्स बढ्न जान्छ।
उच्च रक्तचाप र इन्सुलिन रेजिस्टेन्सबीच सीधा सम्बन्ध हुन्छ। जब उक्त रक्तचापको समस्या हुन्छ, धमनीहरू साँघुरा र कठोर बन्न पुग्छन्। त्यसका कारण शरीरमा रक्त सञ्चार प्रभावित हुन्छ। त्यसपछि कोशिकाहरूले ग्लुकोजलाई सही ढंगबाट प्राप्त गर्न सक्दैनन्। र, रगतमा सुगर जम्मा हुन्छ। अनि, टाइप-२ डाइबिटिजको खतरा बढ्न पुग्छ। त्यसैले रक्तचाप नियन्त्रण नै यसको एक मात्र उपचार हो।