काठमाडौँ । चितवनका सात पालिकामा उम्मेदवारी दिएकामध्ये तीन सय १९ जनाले उम्मेदवारी फिर्ता लिएका छन् । भरतपुर महानगरको प्रमुखमा २७ र उपप्रमुखमा १० जनाको उम्मेदवारी कायम भएको छ ।
मुख्य निर्वाचन अधिकृतको कार्यालयले महानगर प्रमुखमा ३ र उपप्रमुखमा ३ जनाले उम्मेदवारी फिर्ता लिएको जनाएको हो । कार्यालयका अनुसार कायम भएका उम्मेदवारमध्ये प्रमुखमा १५ जना राजनैतिक दलका र स्वतन्त्र उम्मेदवार १२ जना छन् ।
यस्तै उपप्रमुखमा ८ जना राजनैतिक दलबाट र २ स्वतन्त्र रहेको कार्यालयका सूचना अधिकारी पुरुषोत्तम पौडेलले जानकारी दिए ।
यही वैशाख ३० गते हुने स्थानीय तहको निर्वाचनका लागि जिल्लामा एक हजार ९५१ जनाको उम्मेदवारी कायम भएको छ । निर्वाचन कार्यालय चितवनका प्रमुख भिमसेन कार्कीका अनुसार जिल्लाका सात पालिकाको प्रमुखका लागि ६७, उपप्रमुखका लागि ४० जनाको उम्मेदवारी कायम भएको छ । वडाध्यक्षमा चार सय २५, खुल्ला सदस्यमा सात सय ३९, महिला सदस्यमा तीन सय ६६ र दलित महिला सदस्यमा तीन सय १४ जनाको उम्मेदवारी कायम रहेको छ ।
रत्ननगर नगरको प्रमुखमा ९ र उपप्रमुखमा ८, खैरहनीको प्रमुखमा ७, उपप्रमुखमा ४, राप्तीको प्रमुखमा ८ र उपप्रमुखमा ५, कालिकाको प्रमुखमा ७ र उपप्रमुखमा ५ र माडीको प्रमुखमा ५ र उपप्रमुखमा ६ जनाको उम्मेदवारी कायम छ । जिल्लाको एक मात्र गाउँपालिका इच्छाकामनामा अध्यक्षमा ४ र उपाध्यक्षमा २ जनाको उम्मेदवारी कायम छ ।
उम्मेदवारी फिर्ता लिने समय अवधिमा तीन सय १९ ले उम्मेदवारी फिर्ता लिएको कार्कीले जानकारी दिए । जिल्लामा एक महानगर, पाँच नगरपालिका र एउटा गाउँपालिका रहेका छन् ।
सात पालिकामा गरी तीन लाख ९७ हजार ६८५ मतदाता छन् । जसमध्ये दुई लाख ४ हजार ६६६ महिला र एक लाख ९३ हजार १८ पुरुष रहेका छन् । अन्य एक जना मतदाता रहेको आयोगले जनाएको छ । मुख्य निर्वाचन अधिकृतको कार्यालयले आज १० बजेपछि उम्मेदवारलाई निर्वाचन चिन्ह प्रदान गर्ने कार्यक्रम रहेको छ ।
