भरतपुर महानगरपालिकाको प्रमुखमा स्वतन्त्र उम्मेदवारी दिएका कांग्रेस नेता जगन्नाथ पौडेलले आफ्नो उम्मेदवारी फिर्ता लिएनन्।
गृहमन्त्री बालकृष्ण खाण र विनाविभागीय राज्यमन्त्री उमेश श्रेष्ठको प्रयासका बावजुद उनले उम्मेदवारी फिर्ता नलिएका हुन्।
शुक्रबार पाँच बजेसम्म उम्मेदवारी फिर्ता लिने समय थियो। तर, पौडेल आफ्नो अडानमा अडिग रहे।
माओवादी केन्द्रकी उम्मेदवार रेणु दाहाललाई जिताउन कांग्रेसले पौडेललाई उम्मेदवारी फिर्ता लिन निर्देशन दिएको थियो। तर, फिर्ता नलिएपछि उनी पार्टीको विधानअनुसार स्वतः कांग्रेसबाट निष्काशित भएका छन्। पौडेल मात्र नभई उनका प्रस्तावक र समर्थक दुवै स्वतः निष्काशनमा परेका छन्।
पौडेलको उम्मदवारीमा कृष्णलाल सापकोटा प्रस्तावक र मीना खरेल समर्थक बनेका छन्। कांग्रेसले बागी उम्मेदवारी फिर्ता नलिने पार्टी कार्यकर्ताहरू पार्टीबाट स्वतः निष्काशित हुने बताएको थियो।
