काठमाडौँ । जिल्लाको बूढानीलकण्ठ नगरपालिकामा ३०८ जनाको उम्मेदवारी दिएका छन् ।
काठमाडौँ जिल्लाको उत्तरी क्षेत्रमा अवस्थित बूढानीलकण्ठमा आगामी वैशाख ३० गते हुने स्थानीय निर्वाचनका लागि विभिन्न पदमा उक्त उम्मेदवारी परेको हो ।
बूढानीलकण्ठ नगरपालिकाका निर्वाचन अधिकृत चमिला भट्टराईका अनुसार नगरप्रमुखमा १५ र उपप्रमुखमा ६ जनाको उम्मेदवारी परेको छ । वडाध्यक्षमा ७१, महिला वडा सदस्यमा ५४, दलित महिला सदस्यमा ४८ र खुला सदस्यमा ११४ जनाको उम्मेदवारी परेको छ ।
बूढानीलकण्ठमा कूल १३ वटा वडाहरू रहेको छ । बूढानीलकण्ठमा नेपाली कांग्रेसबाट नगरप्रमुखमा विनोद चालिसे र उपप्रमुखमा रमिला वाग्ले, नेकपा एमालेबाट नगरप्रमुखमा मिठाराम अधिकारी र उपप्रमुखमा अनिता लामा र नेकपा माओवादी केन्द्रबाट नगरप्रमुखमा डम्बरप्रसाद अधिकारी र उपप्रमुखमा कमला गौतमले उम्मेदवारी दिएका छन् ।
विं.सं. २०७४ मा सम्पन्न स्थानीय तहको निर्वाचनमा बूढानीलकण्ठ नगरपालिकाको नगरप्रमुखमा नेकपा एमालेका उद्धव खरेल र उपप्रमुखमा एमालेकै रमादेवी राई विजयी भएका थिए ।
