काठमाडौं- सन् २०२५ सम्म औलो निवारण गर्ने सरकारको लक्ष्य छ। टेकुस्थित इपिडिमियोलोजी तथा रोग नियन्त्रण केन्द्रले विश्व औलो दिवसको पूर्वसन्ध्यामा आइतबार आयोजना गरेको सञ्चारकर्मीसँगको अन्तरक्रिया कार्यक्रममा सो जानकारी दिएको हो।

अन्तरक्रिया कार्यक्रममा इपिडिमियोलोजी तथा रोग नियन्त्रण महाशाखाका निर्देशक डा.चुमनलाल दासले सन् २०२२ सम्म स्थानीय औलोलाई शून्यमा पुर्‍याएर सन् २०२५ सम्ममा औलो नियन्त्रण गर्ने लक्ष्य रहेको बताए। मलेरिया भनिने औलो रोगबारे जनचेतना फैलाउने उद्देश्यले हरेक वर्ष अप्रिल २५ मा विश्वभर औला दिवस मनाइन्छ।

यस वर्ष ‘औलोको भार कम गर्न नयाँपनमा जोड दिऔँ र जीवन बचाऔँ’ भन्ने नाराकासाथ यस वर्षपनि औलो दिवस मनाइँदैछ । नेपालमा सन् १९८० को दशकमा महामारीको रुपमा रहेको औलो अहिले निवारण उन्मुख छ। सन् २०१७ देखि औलोबाट हुने मृत्युलाई शून्य बनाउनुका साथै विगत दुई वर्षदेखि औलोका बिरामी एक हजारभन्दा कम संख्यामा झार्न सफल भएको केन्द्रले जनाएको छ।

नेपालले सन् २०२५ भित्रै औलो निवारण गर्ने गरी काम गरिरहेको डा. दासले जानकारी दिए । लामखुट्टेको टोकाइबाट औलो लाग्ने गर्छ। औलो फैलाउने लामखुट्टे प्रायः फोहर तथा दूषित पानीमा बस्छ। औलोका कारण ज्यान गुमाउनेमा पाँच वर्षमुनिका बालबालिका धेरै छन्। बालबालिका, गर्भवती, सुत्केरी र रोग प्रतिरोधात्मक क्षमता कमजोर भएकाहरु औलोको जोखिममा रहेको विश्व स्वास्थ्य संगठनले जनाएको छ। बेस्सरी टाउको दुख्नु, वाकवाकी तथा वान्ता हुनु, हात-खुट्टा तथा जोर्नी दुख्नु, थकान तथा कमजोरी महशुस हुनु, शरीरमा रगतको कमी हुनु र ज्वरो आउनु औलोका लक्षण हुन्।