भैरहवा- करोडौं खर्चेर बनाइएको गौतमबुद्ध अन्तर्राष्ट्रीय विमानस्थलको आम्दानी भने न्यून छ।
विमानस्थलले आर्थिक वर्ष ०८०-८१ मा करिब २४ लाख रुपैयाँ मात्र आम्दानी गरेको छ। पछिल्ला वर्षहरूमा यात्रुको चाप त्रिभुवन अन्तर्राष्ट्रीय विमानस्थलले खेप्न संघर्ष गरिरहेका बेला तत्कालीन प्रधानमन्त्री शेरबहादुर देउवाले २ जेठ ०७९ मा भैरहवामा निर्मित अन्तर्राष्ट्रीय विमानस्थल तामझाम साथ उदघाटन गरे।
तत्कालीन प्रधानमन्त्री सुशील कोइरालाले ०७१ सालमा यसको शिलान्यास गरेका थिए। ०७९ सालमा निर्माण सम्पन्न भई उदघाटनपछि भैरहवाको रूपरेखा फेरिने सबैमा उत्साह थियो। करोडौं लगानीका होटलहरू सञ्चालनमा आउनुको मुख्य कारण त्यही थियो। विमानस्थल पूर्ण क्षमतामा सञ्चालनमा आएर भैरहवा क्षेत्रमा आर्थिक गतिविधि चलायमान हुने व्यवसायीहरूको आशा थियो। तर, अहिले त्यो आशा निराशामा परिणत भएको छ।
विमानस्थल उदघाटन भएको लामो समयसम्म पनि अन्तर्राष्ट्रीय उडान गर्न असफल भयो। अहिले पनि पर्याप्त अन्तर्राष्ट्रीय उडानहरू गर्न सकिरहेको छैन।
विमानस्थलमा सन् २०२४ का १२ महिनामा अन्तर्राष्ट्रीयतर्फ २९७ वटा उडान भए। ती उडानमार्फत ९ हजार ४६६ यात्रुले मात्र सेवा लिएको विमानस्थलका प्रवक्ता दीपक बज्राचार्यले जानकारी दिए।
उनका अनुसार सन् २०२४ का १२ महिनामा अन्तर्राष्ट्रीय उडानमार्फन ७५७ जना विदेशी पर्यटकहरूले उडान र अवतरण गरे।
केही महिनादेखि बन्द रहेको अन्तर्राष्ट्रीय उडान अब भने पुनः सञ्चालनमा आउने विमानस्थल प्रमुख प्रतापबाबु तिवारीको दाबी छ।
पर्यटन व्यवसायी सञ्जय बजिमयले यो विमानस्थलको आम्दानी बढ्नुपर्नेमा घट्दै जानुको कारण इन्डाइरेक्ट कनेक्टिभिटी कारक रहेको बताए। जबसम्म डाइरेक्ट कनेक्टिभिटी हुँदैन, तबसम्म कुनै पनि हालतमा विमानस्थलले आम्दानी वृद्धि गर्न नसक्ने उनको ठम्याइ छ।