भारतमा उत्तरप्रदेश र बिहारका दुई कृषि उपजलाई प्रधानमन्त्री अवार्डबाट सम्मान गरिएको छ।
उत्तरप्रदेशको ‘कालानमक’ चामल र बिहारको ‘मखाना’ सम्मानित भएका हुन्। उत्तरप्रदेशको सिद्धार्थनगर जिल्लामा ‘कालानमक’ नाम दिइएको चामल प्रबर्द्धनको प्रयास गरिएको थियो। यस्तै, बिहारको दरभंगा जिल्लामा ‘मखाना’को प्रबर्द्धन गरिएको थियो। दुवै जिल्लाका अधिकारीहरूले दुवै उत्पादनलाई सम्मान गरेका हुन्।
भारतको १५औँ निजामति सेवा दिवसका अवसरमा बिहीबार दिल्लीस्थित विज्ञान भवनमा ती कृषि उपजलाई सम्मान गरियो।
‘कालानमक’ चामललाई ‘एक जिल्ला एक उत्पादन’ कार्यक्रमअन्तर्गत अवार्ड दिइएको हो। सिद्धार्थनगर जिल्लाले आफ्नो एक उत्पादनका रूपमा कालानमकलाई प्रोत्साहित गरेको थियो। यो चालम सुगन्ध र पोषक तत्त्वका लागि प्रख्यात छ। केही वर्षयता उक्त चामलको बजार तीव्र रूपमा बढेको छ। र, किसानले सीधा लाभ हासिल गरिरहेका छन्।
यस्तै, ‘मखाना’ पनि दरभंगाको एक जिल्ला एक उत्पादन कार्यक्रमबाट प्रबर्द्धित गरिएको थियो। दरभंगामा यो कृषि उपज बर्सेनि चार हजार टन उत्पादन हुन्छ। यसको उत्पादनमा बिहारका करिब एक करोड २५ लाख परिवार आबद्ध छन्।