काठमाडौं- भुटानका राजा जिग्मे खेसर नाम्ग्याल वाङचुक भोलि नेपाल आउँदै छन्।

उनी विशुद्ध व्यक्तिगत भ्रमणमा आउन लागेको परराष्ट्र मन्त्रालयका एक उच्च अधिकारीले जानकारी दिए।

उनका अनुसार भारतको दुई दिने भ्रमणमा ५ डिसेम्बर बिहीबार राजा जिग्मे नयाँदिल्ली पुगेका छन्। नयाँदिल्लीबाट भुटान फर्किने क्रममा उनी भोलि बिहान १० बजेतिर काठमाडौं उत्रिने र अपराह्न ४ बजे स्वदेश फर्किने कार्यक्रम छ।

काठमाडौंमा रहँदा उनले यहाँस्थित बौद्ध धार्मिक स्थलहरू बौद्धनाथ र स्वयम्भुनाथ दर्शन गर्ने कार्यक्रम तय भएको छ। अहिलेसम्म नेपालका कुनै राजनीतिक भेटघाट तय नभएको परराष्ट्र मन्त्रालयले जनाएको छ। मन्त्रालयका अनुसार अनुसार राजा जिग्मेलाई काठमाडौंस्थित त्रिभुवन अन्तर्राष्ट्रीय विमानस्थलमा परराष्ट्र मन्त्रालयका अधिकारीहरूले स्वागत गर्ने तय भएको छ।