पाकिस्तानले छिमेकी मुलुक अफगानिस्तानको पूर्वी क्षेत्रमा हवाई हमला गरिरहेको छ। समाचार एजेन्सी एएफपीले अफगानी सरकारी अधिकारीहरूलाई उद्धृत गर्दै जनाएअनुसार अफगानिस्तानको खोस्त र कुनार सुबेमा गरिएको आक्रमणमा कम्तिमा ४७ जना मारिएका छन्।

खोस्त क्षेत्रका अधिकारी सबिर अहमद उस्मानीका अनुसार पाकिस्तानी हवाई हमलामा परी त्यस इलाकाका ४१ जना निहत्था नागरिक मारिएका छन् भने अन्य २२ जना घाइते भएका छन्। मारिएकाहरूमा महिला र बालबालिका बढी रहेको उस्मानीले बताए। यस्तै, अर्का एक अफगान अधिकारीका अनुसार कुनार प्रान्तमा ६ जना मारिएका छन्।

पाकिस्तानभित्र अफगानी भूमिबाट आतंक मच्चाइरहेकाले हवाई आक्रमण गरिएको पाकिस्तानी अधिकारीहरूको भनाइ छ। पाकिस्तानले दुई मुलुकको सीमा क्षेत्रलाई सुरक्षित बनाउन अफगानिस्तानको तालिबान सरकारसँग आग्रह गर्दै आएको छ।

अफगानिस्तानको रक्षा मन्त्रालयले पाकिस्तानी सैन्य जेट विमानहरूले ती क्षेत्रमा निरन्तर आक्रमण गरिरहेको बताएको छ। र, त्यसबाट ठूलो नोक्सानी बेहोर्नु परेको जनाएको छ। यस्तै, पाकिस्तानको विदेश मन्त्रालयले अफगानी भूमिबाट आफ्ना सुरक्षा बलमाथि निशाना बढाउने प्रवृत्ति बढेको बताएको छ।

अफगानी भूमिमा बसेर पाकिस्तानको प्रतिबन्धित तहरिक–ए–तालिबान पाकिस्तानलगायत अतिवादी समूहहरूले आफ्ना सीमा सुरक्षा पोस्टहरूमा आक्रमण गरिरहेको पाकिस्तानको भनाइ छ। त्यस्ता समूहको आक्रमणबाट आफ्ना धेरै सैनिक मारिएको पाकिस्तानको दाबी छ।