उत्तरकोरिया चरम भोकमरीबाट गुज्रिरहेको छ। तर, शासक किम जोङ–उनलाई त्यसको कुनै परवाह छैन। एकपछि अर्को गर्दै मिसाइल परीक्षणमा लागि परेका छन्, उनी।
जनता भोकभोकै रहँदा किमले नयाँ हतियार परीक्षण गरेका हुन्, जसबाट सैन्य क्षमतामा बढोत्तरी भएको उनको दाबी छ।
विशेषज्ञहरूका अनुसार नयाँ मिसाइल साना परमाणु हतियार प्रहार गर्न सक्षम छ। र, प्रतिबन्धका बावजुद परमाणु हतियार परीक्षणतर्फ उत्तरकोरिया लम्केको छ।
दक्षिणकोरियाको सेनाका अनुसार शनिबार राति उत्तरकोरियाले समुद्मा दुईवटा मिसाइल परीक्षण गरेको हो। उत्तरकोरियाका संस्थापक किम इल–सुङको जन्मजयन्तीको अवसरमा नयाँ हतियार परीक्षण गरिएको दक्षिणकोरियाको सेनाको अनुमान छ।
आइतबार बिहान उत्तरकोरियाको सरकारी समाचार एजेन्सी केसीएनएले किमले नयाँ प्रणालीको हतियार परीक्षण गराएको बताएको छ। त्यसबाट लामो दूरीमा प्रहार गर्न मिल्ने क्षेप्यास्त्रमा अत्यधिक सुधार भएको केसीएनएको रिपोर्टमा उल्लेख छ। र, त्यसबाट सामरिक परमाणु हतियार सञ्चालन क्षमता बढाएको समाचार केसीएनएको छ।