काठमाडौं– अमेरिकी राष्ट्रपतीय निर्वाचनमा रिपब्लिकन उम्मेद्वार तथा पूर्व राष्ट्रपति डोनाल्ड ट्रम्प विजयी भएका छन्। समाचार संस्था एपीले सार्वजनिक गरेको पछिल्लो तथ्यांकअनुसार ट्रम्पले २७७ इलेक्टोरल कलेज मतसहित जित सुनिश्चित गरेका हुन्।

मतगणनाको अन्तिम परिणाम भने आइसकेको छैन। अन्तिम परिणाम अगावै ट्रम्पले जित सुनिश्चित गरेका हुन्। ५३८ सदस्यीय इलेक्टोरल कलेजमा जितका लागि कम्तिमा ५० प्रतिशत अर्थात २७० इलेक्टोरल मत आवश्यक पर्छ। उनकी प्रतिद्वन्द्वी वर्तमान उपराष्ट्रपति ह्यारिसले भने २२४ इलेक्टोरल मत प्राप्त गरेकी छन्।

५ नोभेम्बरमा सम्पन्न निर्वाचनको मतगणना जारी छ। ट्रम्पको पक्षमा मत अझै बढ्ने एपीले जनाएको छ।

नयाँ राष्ट्रपतिमा निर्वाचित भए पनि ट्रम्पले तत्काल कार्यालय सम्हाल्न भने पाउने छैनन्। उनको सपथ आगामी जनवरीमा मात्र हुनेछ। अमेरिकी संविधानअनुसार एक राष्ट्रपतिको कार्यकाल चार वर्षको हुनेछ। प्रत्येक चार वर्षको नोभेम्बर महिनाको पहिलो मंगलबार निर्वाचन हुने र आगामी जनवरीमा राष्ट्रपतिको सपथ हुने व्यवस्था छ। राष्ट्रपतिसँगै समान प्रक्रियाबाट उपराष्ट्रपति निर्वाचित हुनेछन्।

अन्तिम मत परिणाम अगावै ट्रम्पले फ्लोरिडामा रहेको चुनावी मुख्यालयमा आफ्ना समर्थकहरूलाई सम्बोधन गर्दै जितको घोषणा गरिसिकेका थिए। उनको सम्बोधन सुन्न ठूलो संख्यामा मानिसहरू भेला भएका थिए।

सम्बोधनका क्रममा उनले डेमोक्रेटिकले घाइते बनाएको देशलाई निको पार्ने प्रतिवद्धता व्यक्त गरेका छन्। उनले भने, ‘हामी हाम्रो देशलाई निको पार्नेछौं।’ उनले आफ्नो कार्यकाल अमेरिकाको लागि ‘स्वर्ण युग’ हुने दाबी गरेका छन्। ‘मेक अमेरिका ग्रेट अगेन’को नारा साकार पार्ने प्रतिवद्धता गरेका छन्।

‘यो अमेरिकी जनताका लागि ठूलो विजय हो। जसले हामीलाई अमेरिकालाई फेरि महान बनाउन सक्षम बनाउँछ,’ ट्रम्पले भने, ‘अमेरिकाले हामीलाई अभूतपूर्व र शक्तिशाली बहुमत दिएको छ।’